「大四喜」爆紅多Job數唔到

劉丹、羅樂林、黎彼得及陳榮峻組成「大四喜」，昨日與林淑敏、呂慧儀、滕麗名等人宣傳新節目《PARK YOHO周末速遞》，四人早前憑人氣殺出香港，到澳門以組合形式登台，問可有其他工作？黎彼得笑說：「多到數唔到，推晒啫嘛！我哋不會咁濫。（因為酬勞要分四份唔吸引？）我哋分大細份，丹爺的最大份！」問到有否相約練歌？黎彼得笑言：「各有各練喎，在廁所練！陳榮峻就同老婆（吳香倫）晚晚抱住練囉，丹爺就抱住個孫女練！」提到孫女小糯米，劉丹即時笑不攏嘴，問到孫女可認得他？劉丹笑說：「跳埋舞添！但冇唱埋一份，可能佢諗緊爺爺幾廿歲人都唔知做緊乜！」
林淑敏與「大四喜」同樣獲網民支持而彈起，她笑說：「要多謝觀眾咁支持我同個節目，而幕後亦都好聽民意，令節目愈來愈好！」
文、圖：李文偉