鍾鎮濤逼梁朝偉開金口

文：娛樂組

鍾鎮濤前晚舉行尾場個唱，台上台下依然星光熠熠，眾「217」好友成員齊捧場，計有梁朝偉和劉嘉玲夫婦、杜德偉伉儷、曾志偉、汪明荃（阿姐）、蔡一傑、陳欣健等，雖然偉仔怕醜不肯揸咪開金口，但得到嘉玲代夫開腔。而帶領「汪阿tag」新潮流的阿姐當晚更上一層樓玩直播，不過新手阿姐高呼識開唔識關要高呼求救，被網民大讚可愛！

鍾鎮濤（B哥）一連兩場《故事繼續》演唱會前晚圓滿落幕，梁家輝和溫拿成員繼續任表演嘉賓，家輝為了是次演出扭傷腳也在所不惜；而台下也繼續星光熠熠撐B哥。
當B哥在台上唱偉仔的《你是如此難以忘記》前，B哥向台下的偉仔說：「其實係佢（偉仔）今晚嚟踢館！」並叫偉仔先唱然後他再跟住唱，但偉仔以其迷人電眼及略帶怕醜的笑容婉拒，在旁的嘉玲就代唱了幾句，而偉仔唔使揸咪下就肯與志偉在座位上跟合唱。其後阿倫（譚詠麟）與溫拿成員現身與B哥合唱時，阿倫笑指家輝前一晚扭親腳不知當晚會否出現；話口未完，家輝應聲登場，並聯同杜德偉和溫拿一起合唱，氣氛熱烈。
阿姐識開唔識關
當晚台下還有一大亮點，近期愛上網上分享的阿姐繼「汪阿tag」後，前晚再玩直播。阿姐在直播片中表示自己唔識玩，是家輝叫她開，家輝就笑指自己也不識，但知道阿姐識。當阿姐拍到偉仔時，她問偉仔有沒有玩過直播，偉仔一面尷尬稱沒有，阿姐即着偉仔讓她影住便可；搞笑是志偉看到阿姐做直播，即大叫了一聲「嘩」！不過更搞笑是，阿姐原來識開唔識關，拍了4分鐘後求救高呼：「點閂㗎？」網民紛紛留言讚阿姐可愛。
另外，當晚難得兩大影帝同場，嘉玲昨日在社交網上載偉仔與家輝合照，家輝還緊依偎在偉仔的胸堂雙手緊緊攬實，但偉仔卻面容扭曲，相當有趣。