高Ling「執屍」難頂惡臭

■高海寧耍起劍來有板有眼。

文、圖：彭形影

高海寧（高Ling）昨日以露腰裝出席活動，與武林高手學功夫，有板有眼！最近高Ling拍新劇《殺手》獲監製度身訂造清道夫角色，專責為殺手善後執屍，她兒時最鍾意劏青蛙、老鼠，不怕見內臟，反而覺得天熱引發惡臭最難頂。
高Ling昨日表示拍完《C9特工》後對打戲產生興趣：「我有做開運動，自覺手腳靈活，豈料拍攝初期仍遭武指批評太滋油兼慢手慢腳，3個月後終獲武指讚我有進步。」
雖然在新劇《殺手》中不用打，但高Ling自爆要做「清道夫」：「我小時候喜歡讀生物學，最鍾意劏青蛙、老鼠，監製度身訂造一個清道夫角色給我，即是殺手殺人後我負責執屍。早前已拍了死豬及內臟場面，雖然我不怕核突，但天氣熱引發的臭味最難頂！而且要講很多化學名詞，李佳芯也經常叫我說回人話，哈哈！」她又指為了演「清道夫」角色而減磅，最開心是練出「馬甲」，亦不介意上圍會否縮水。
龔嘉欣成身瘀
此外，同樣有份參演《殺手》的龔嘉欣，早前在社交網分享過為動作場面受訓的過程，她坦言手腳不算靈活且腳筋硬得誇張，不聰明兼記性不是特別好，但相信勤力練習就可做到。日前嘉欣還在社交網晒背脊貼上幾塊鎮痛貼的照片，更見到手臂瘀傷，她坦言：「一個動作我可能要做好多次先至達到要求，動作我真係唔叻，但係我會盡力，辛苦每一個配合嘅對手陪我做足咁多次，睇番Playback，幾辛苦都係值得，原來我係可以做到㗎。」

■嘉欣與武林高手學功夫。 ■嘉欣為練動作戲，搞到背脊瘀傷。 ■龔嘉欣為動作場面積極受訓。 ■高Ling最開心是能練出「馬甲」。