卓韻芝獲天后姊妹團送嫁

■卓韻芝與老公梁子賢昨日註冊結婚。

文：游艾維
圖：羅安強

雖然颱風「山竹」來襲，卓韻芝昨日仍跟丈夫梁子賢於中環外國記者會舉行婚宴，鄭秀文（Sammi）、梁詠琪（GiGi）與蔡卓妍（阿Sa）組成「天后級姊妹團」，而導演許鞍華、郭啟華、田蕊妮、蔡一智與徐天佑等紛紛到賀。

卓韻芝的「天后級姊妹團」鄭秀文（Sammi）、梁詠琪（GiGi）與蔡卓妍（阿Sa）三人在婚宴前接受訪問， 她們同樣穿上淺粉紅色姊妺裙。問到早上的接新娘環節？ GiGi說：「無呀！可能佢唔捨得玩新郎啦！」阿Sa則 表示是日最重要係靚，笑言無謂玩人時又玩到自己。Sammi 笑道：「好替卓韻芝開心，佢件婚紗咁靚，無謂玩爛佢件婚紗啦！我哋主要任務係伴住佢影相，見證佢一陣間嘅簽紙儀式，負責擺甫士。」
問到酒量如何，可會幫手頂酒？ 阿Sa笑道：「我都頂得幾杯嘅！」Sammi則笑言：「我個樣好似飲得，其實普通咋，飲少少啦！睇吓咩酒，好飲就飲多兩杯。」至於可有傳授夫妻相處之道給卓韻芝，GiGi說：「婚前派對阿芝都有問我哋嘅，都有分享吓。今日好睇得出阿芝嗰份快樂同喜悅，今日係最神采飛揚嘅一日。」
問到送上甚麼賀禮？Sammi跟阿Sa都笑笑口表示不便透露，GiGi則表示代阿芝捐錢做慈善，阿芝都認為此舉很有意義。至於可會催阿芝生B？ Sammi笑言：「佢想生就生，唔生就唔生啦！」
此外，阿Sa又自爆昨早才問卓韻芝做姊妹是否需要做人情，她笑道：「入到房我先開Speaker聽，幾尷尬呀！不過真心戥佢好開心，會補番禮物畀佢，因為我同阿芝都係識於微時。」問到阿Sa今日會否落力搶花球？Sammi笑道：「嘩！佢年中接咗幾個喎！」阿Sa則笑謂：「唉！我臨出門口都有問助手，究竟我仲有咩朋友未結婚，之後諗到得番容祖兒一個，差佢一個就搞掂晒。」Sammi又取笑阿Sa說：「你接埋接埋咁多可以做乾花球喎！」阿Sa坦言：「咁我今日避一避先喇！」
先擺酒後註冊
另外，原來卓韻芝跟丈夫梁子賢早於本周一（10號）已低調完成擺酒儀式。阿芝表示分開兩天舉行婚禮是怕招呼不到，先擺酒後註冊，擺酒是為了親屬長輩，而昨日舉行的婚宴派對是為了朋友。擺酒當日，中國傳統「過大禮」及「接新娘」儀式都有做足。
新娘子卓韻芝接受訪問時笑說：「真係打風都打唔甩，一直都有留意關於風暴消息，上網搜尋山竹係夫妻果，感覺好切合結婚。」問到可有考慮過賓客安全？她說：「係啊！啲長輩食完嘢就會走先，做完訪問就會即刻同佢哋影相，等佢哋走先。」

■一對新人笑言打風打唔甩。 ■天后姊妹團與新娘子開心合照。 ■一對新人向卓韻芝的婆婆斟茶。 ■一對新人與卓韻芝婆婆及主婚人俞琤合照留念。