誠哥掌機自拍 與記者大合照

長和系四家公司十六日罕有齊齊派發去年度成績表，令市場揣測李嘉誠可能會宣布辭職，成為新聞界一大盛事，故吸引數以百計傳媒採訪，不少傳媒下午食完飯，大概下午一時多，便自動現身長江中心排隊等進場霸佔好位。由於記者會在下午四時三十分才開始，早到的記者隨時等兩三小時，而長江中心地下大堂亦放滿記者的攝影器材及腳架，排隊坐升降機亦出現人龍。
由於出席業績會的傳媒眾多，加上要排隊搭升降機上樓，攝記雖已就位，但文字記者仍未全數進入記者會場地，李超人便已施施然進入會場，頓時引起一陣哄動。超人退休心情亦大佳，當他企起身想交代退休事情，大會司議叫超人等等，超人問點解要等等，司議說要先介紹他，超人即說：「個個都識唔使介紹啦！」即時進入戲肉，讀出退休宣言。
爭相發問 一度混亂
臨近尾聲，超人例牌再坐一會答記者問題，仲話「咁多位朋友，咁多年嚟，你哋對我一般來講都好好，所以我俾你哋影相影多啲，你哋問多我五分鐘到十分鐘，我就落嚟同你哋一齊影相。你哋安排我點影，我就點影，大家就保留一個紀念啦！」
答問環節完結，但記者繼續爭相發問，情況一度混亂，司儀一句「大家想影相定發問？」最後連誠哥都補一句：「如果你無心機影相我就走啦喎，仲問你想我落去影相，抑或唔落？」在場記者隨即答「想」，誠哥就行落去同大家影相，更有女記者問超人︰「李生係咪你揸機？」誠哥答「無問題」之後，隨即與一眾記大合照。
誠哥離開會場個時仲有一班記者好似小粉絲咁，追住誠哥話要同佢合照，對於selfie（自拍）的要求，超人幾乎來者不拒，非常親民。睇來呢世紀合照，將成一眾記者最珍惜的紀念照啦！