直認Chilam購億元豪宅首做業主 靚靚要老公送樓：我絕不放過佢！

靚靚笑言要老公Chilam買層樓孝敬自己。

文：彭形影  圖：譚志光

 

袁詠儀（靚靚）前晚出席頒獎禮時，直認老公張智霖（Chilam）豪擲近億元購入大坑豪宅，首次榮升業主。雖然新屋是老公名下，但靚靚笑言一定不會放過老公，定會叫老公買樓孝敬自己！
袁詠儀、宣萱、廖啟智與劉偉強等，前晚出席「全球華語大學生影視獎頒獎禮」。談到有報道指其丈夫張智霖早前豪擲近億元購入大坑豪宅，靚靚直認不諱地謂：「老公本來想層樓寫埋我名，或以我的名義買，但見佢終於儲到錢買樓，而我思想傳統，認為中國人始終要有個家，他才是一家之主，所以層樓是寫老公名，他是首次置業呀！（會送多層樓畀你嗎？）我一定不會放過佢啦，一定要佢送多層樓畀我。（預算過億元？）未知呀！始終投資放租與自住的準則不一樣。」

 

久別重逢被瘋傳

 

靚靚又透露Chilam本來睇中一個過億元的單位，但她沒有心動，連老公都笑她怪。問到何時正式入住新居？靚靚說：「應該要幾年後，考慮會否先租畀人，還是裝修到自己喜歡為止。我喜歡簡單風格，最重要有家的感覺，以前的寓所不會有雜物，家徒四壁咁，但生咗小孩就不再可能如此有型了。（兒子魔童會否對裝修提出意見？）有間房畀佢住已很好，他的意見很有創意，但我不接受，根本不實際，有牀有書便可以了，況且他長大後或許甚少回家呢，哈哈！」
其後，靚靚與宣萱分別在微博上載二人出席該頒獎禮的合照，靚靚更以心心眼emoji兼Tag了宣萱，並寫上：「好久不見！」宣萱亦表示跟老朋友好久不見是一大驚喜。兩位「凍齡女神」的合照隨即遭網友瘋傳，加上二人心有靈犀地同時梳了All Back髮型，令不少網友高呼二人恍如吃了「防腐劑」一樣。
不過，也有網友翻出二人的不和傳聞，有指當年宣萱與Chilam拍攝劇集《天地男兒》時態度親暱而觸怒靚靚，令好姊妹從此絕交多年，近年才弄清是有人搬弄是非，令二人重修舊好，及至2014年，靚靚更在微博上傳與宣萱及陳妙瑛的合照，足證友情歷久彌新。

 

漏網之魚無戲拍

 

此外，智叔在活動上透露剛拍完莊文強的新片，現正「量地」中，無亦未有斟洽他拍劇。他笑言現在的網台百花齊放，可謂「一網打盡」，但自己卻是「漏網之魚」。

Chilam首次置業，便豪擲億元買大宅。（資料圖片） 靚靚與宣萱久別重逢，還心有靈犀地梳了相似的髮型。 宣萱為「全球華語大學生影視獎頒獎禮」擔任嘉賓。 智叔笑言正在「量地」，是「漏網之魚」。