【曾智华专栏】梁家俊要好自为之

美国国务卿鲁比奥上任后，与中国外长王毅通电话，气氛麻麻，尤其王毅要求对方“好自为之”。懂中文者必知，这句说话带有警告意味，英文无论译做Make the right choice或Act accordingly，皆无法表露讲者的神韵。

总之，就是用少少负面语气忠告对方，要作出适当选择或行为，江湖口吻是……唔好玩嘢！

过去一个星期，相信华籍骑师梁家俊（最近频密被罚停赛），必已听到N咁多人对佢作出忠告，甚或警告……好自为之！

年初三第九场千六米赛事，又再出现澳洲帮做大戏，“哈囉文”全程护送“儍仔新”由头放到尾，“软硬鞭”则在中后位置监察，肯定新仔Win得，才大力打上入位。

呢种布局，早前我也曾在此指出。当佢哋计过，有只马可以由头放到尾，就安排自己友新仔去马，丁友仔冇乜骑技，但胜在信得过，总之两位大佬沿途护住就掂。

当然，其他马要识做，咪笃爆。

但马有马性，你想佢唔跑但佢想跑，咁会点？咁就出现呢场梁家俊的跑法。

小弟再三由头睇到尾只“保罗传奇”点跑（根本冇跑过？），真是眼冤。由出闸开始不停人马角力向后望，全不专注，想在揾乜（怕剧本做唔到？），绝非一心一意争取最佳位置。

入到直路，队入一棚马之后，当然㖞呵。“保罗传奇”本身属放头马，佢排二档都唔放，仲沿途抽住抽住，咁跑马，日后必须“好自为之”嘞。

明日第八场一班千二米，好有趣，两只明星马“华丽再胜”及“精算暴雪”难明点解又出，为乜唔留力跑级制赛？呢场似有爆冷伏线。大家请留意“魔术控制”及“小霸王”，后者上次尾段好鬼厉害啊。