【曾智华专栏】火速提出评税反对

作为奉公守法一市民，小弟数十年如一日，当收到个人入息税单时，必会第一时间立即缴交，绝不会拖拖拉拉到死线时才郁手。

早年曾经被同事笑正“猪揼兜”，为乜唔攞十万八万元税款先存定期，赚返笔利息先呢？

性格使然，怕烦，从来最憎欠任何人钱，包括政府及银行，故此，坚决铺铺清，一个仙都不欠任何人（早年曾同时挨三份工还楼贷），缴款后毋须再心挂挂，怕迟交被罚。

我有几位老友以为自己好醒，拖呀拖唔交，结果过咗期才醒起，大镬，冇人情讲，即罚一成欠款数额的附加费，事后揼到爆……

讲完。不过，今年小弟出现收税单后冇第一时间交费的破例情况，点解？因见到个银码吓一跳。

原因正是去年接咗份外判工作，多咗笔额外收入，当然照报。一报之下，弊家伙，立即交两份税，一份是应交的，一份是预缴的。真系揸住有啲手震，因从冇心理准备要交咁多，失预算，点搞呢？

揸住张税单睇呀睇，咦……有项叫“你的权利”噃。标题是“对这评税提出反对”。内容指出，若纳税者对评税有疑问，必须在1个月内以书面向税务局提出反对，并列出理由。若1个月内未行动，即使你之后提出反对，也必被“先斩后奏”（即先交全部税款）。

我点搞？当然第一时间执笔（已经N年冇写过信），向税务局长呼冤，声明去年的外判工作，只属一次过，今年不会再有，故恳请将预缴的一项抽起。

好彩有做又做得精准，果然有效。两个星期后，再收到税局通知，“关于暂缓缴纳薪俸税暂缴税”（使唔使水蛇咁长）个案获批。

即时交少几万大元，哗……舒服晒呀！