独家丨85岁梁爱曾三次送院抢救愿做大体老师 为偶像Eason出山获孝敬大利是

陈奕迅(Eason)相隔5年推出新专辑《CHIN UP！》，除有影帝梁朝伟惊喜现身新歌《社交恐惧癌》MV外，化身大厦清洁工的85岁老戏骨梁爱更有话题性。相约爱婆婆做访问唔容易，精叻嘅佢怕被骗，拒绝接听陌生人电话，后来被记者诚意留言打动主动回电。从影超过半世纪，爱婆婆睇住唔少巨星成长，欣赏以往艺人全部挨出嚟，唔似新一代得个样，又激赞Eason及发哥最敬老，“我老眼昏花啫，但冇睇错人。”她透露已签下不急救同意书，笑言：“收够筹就走，好死好过发达。”采访：方骞平

85岁梁爱视Eason为偶像，所以破例出山拍摄，在MV饰演大厦清洁工。

爱婆婆因为喜欢陈奕迅才答应演出。

梁爱好锡陈奕迅。

陈奕迅新歌《社交恐惧癌》MV仲有影帝梁朝伟。

爱婆婆以缘份安排形容今次访问，相约影相，她以“瘦到皮包骨，得返85磅。”为由拒绝，坚持唔曝光的她自嘲：“我唔想畀人睇到呢个婆婆好凄凉，临老震震吓，你知有啲香港人知少少扮代表。”

爱婆婆想保持靓样。

发哥车出车入夹𩠌照顾

近年爱婆婆因健康问题甚少演出，但肯为偶像Eason出山：“我𠵱家钟意玩就玩做就做，有精神就净系做自己友，好似Eason咁就破例拍摄。我最钟意佢正气，哈！我呢个人好衰㗎，睇靓仔正气就ok。”爱婆婆大赞Eason好nice，为她上落车开关车门，仲私人醒她一万元大利是：“其实佢公司畀咗酬劳我，所以我话唔要，佢叫我‘乖啦’塞返畀我，唔系钱嘅问题，系懂得敬老，你估阿婆有宝咩？虽然我老眼昏花啫，但冇睇错人。”另外爱婆婆都激赞周润发：“呢个世上，一个我个仔，一个发哥对我最好，好锡我。我同发哥仲有联络，佢好乖仔，由以前一齐拍戏到𠵱家行山聚会都会车出车入，饮饮食食唔使我夹钱，仲会帮我夹𩠌斟茶，仲霸气同我讲‘老嘢，你悭返啦我大把钱，有得食就食。’”

爱婆婆劲赞Eason敬老。

1976年，梁爱跟发哥合作剧集《江湖小子》。

城城冇钱搭的士要借宿

有“御用工人”之称的爱婆婆拍戏无数，开工时坐过劳斯莱斯，好景时食鱼翅庆功，坦言等于做咗3世人已冇遗憾，不过，她称自邓萃雯、黎耀祥一代后冇再睇港剧，只会睇返凌波剧作及听内地歌手周深嘅歌，间中又会追吓韩剧。问到对年青艺人印象？爱婆婆答得风趣：“我唔够眼力睇唔清楚，所以一个都唔识，只留意到啲姐姐死都要靓；着高踭鞋行山；做综艺嘅就越嚟越少布，条裙短到几乎见到条底裤，唔识得尊重自己。”她见证以前啲阿哥、阿姐唔系靠样，个个都系挨出嚟：“好似郭富城日以继夜拍《太平天国》，佢住港岛区，冇钱坐的士返屋企，唯有喺黄日华屋企借宿。”一把年纪的爱婆婆唔止分析力强仲仍然有火，她自爆睇新闻见到骗案条气会顶住，仲成日对住家中观音闹人：“真系(苦主)个脑生草嘅，咁冇分析力，无需学历但人工高，边会有咁大只蛤乸呀？听到都调头走啦，衰啲讲做‘鸡’都要除裤啦，唔贪咪唔俾人呃囉，喺街排队攞着数我都唔要呀。”她乘机训言：世上唔会有不劳而获。

1988年，城城跟力捧的“五虎将”黄日华拍《太平天国》，演太平军将领。

在《他来自江湖》中，梁爱演女管家经常同周星驰斗气，更扮盲掴咗星爷一巴。

跟未红天王黎明及梁珊拍《回到未嫁时》。

1980年，同当家花旦汪明荃合作《京华春梦》。

梁爱演过《义不容情》等经典剧集，演家佣角色深入民心。

曾跟炳哥合作。

4年前梁爱跟梁健平及陈国邦拍港台剧《现身说法》。

2003年，亚视剧《爱在有情天》演员马景涛、陈秀雯为李香琴和梁爱庆生。

《天龙八部》演女侠。

演贴地佣工。

爱婆婆多数演草根阶层人物。

独居沙田屋邨活得消遥
85岁梁爱除咗有齐3高，心脏最唔妥，因为揼唔到血上脑，试过3次晕倒要送院抢救，𠵱家晕低次数仲越嚟越密，坦言对生死做晒心理准备：“我闻到𠮶阵味，唉！挨得一日得一日，我行得唔好又力不从心，所以已签咗不急救同意书，唔‘玩’喇！搭通天地线够钟就走。”梁爱丧偶26年，晚年经历56岁儿子隐性心脏病猝死之痛，对于人生睇得好开：“做人要认命，上天要人就要放人，后生求安乐；老来求去得舒服，好死好过发达。80几岁仲唔‘收工’？唔好霸住人哋个位。”她自爆死后会捐遗体做研究，立志做大体老师。对于老年生活，爱婆婆独居沙田区新落成屋邨，乐得消遥自在，生活绝对ok。爱婆婆还幽自己一默：“因为怕跌唔可以弯身及爬高，𠵱家自己高不成低不就，好似水晶咁矜贵跌唔起，好多生活上嘅嘢交由钟点负责。”

梁爱儿子因隐性心脏病猝死，终年56岁。