独家丨新秀梁浩贤力捧变“执笠歌手”致抑郁 古淖文借《中年2》发埋下半场明星梦

TVB公布的《中年好声音2》108强入围名单，包括2000年无线《华人新秀歌唱大赛》冠军梁浩贤及2009年亚视《亚洲星光大道》第5名兼“台风奖”古淖文。2001年，梁浩贤只出过一只碟，华星唱片就清盘；至于亚视出身的古淖文就不甘俾人睇唔起，听到张家辉的经典对白“x你个街，亚视嚟㗎喂！”都唔多高兴。因为未红过，又或歌手路突然急停，两人为证明自己实力，唔怕被耻笑努力发埋下半场明星梦。采访：方骞平 场地：Amelia Hong Kong(古淖文)、悦火炉端烧(梁浩然)

35岁古淖文系完美主意者，至今仍未拣啱对象。

42岁梁浩贤近年从商，已有固定女友，但想建立多啲事业才成家立室。

“永恒亚视”熄灯后，6年前古淖文经已跟情如母子的肥妈表明想过档TVB，但当时肥妈未有安排。今年35岁的古淖文啱啱够“秤”符合“中年”界别，未跟肥妈商量已冲去报名；42岁的梁浩贤反而逃避“中年”两个字，加上有歌手框框怕输故犹豫了一年，终被周吉佩例子打动，想借唱歌来帮助事业。

今年35岁的古淖文啱啱够“秤”符合“中年”界别，即参加《中年2》。

希望肥妈畀分松手

有《中年2》评判肥妈加持，问古淖文是否有着数？他坚持唔打搅阿妈：“咁阿妈都要公平嘛…但如果佢肯松手少少畀我，哈…我控制唔到佢，就算佢公开批评我都系想我进步，双赢㖞，一样开心。”对被指系大热门，古淖文唔会畀自己压力：“评论好坏都有，大致都系话我‘唱咗咁耐唔红，死咗条心啦’；睇完得啖笑咪算囉，唔好受打击，反而有啲赞我唱得好、Keep得好，坦白讲我一定系发明星梦，仲由细发到大，今次当系发埋下半场，而且经历疫情嘅危危乎生活，更想有多啲人认识，得到更多工作机会。”

古淖文半红不黑浮沉娱乐圈14年，望挑战《中年2》发埋下半场明星梦。

古淖文跟肥妈情如母子，但今次参赛就唔敢打扰肥妈。

古淖文直认好贪靓，舍得花钱做健身及做fancl。

少时一炮而红好寸

谈到入行14年辛酸史，古淖文直认当年亚视皇牌节目《星光大道》虽然撼赢TVB《超级巨星》，但喺亚视出身依然被睇低一线，甚至俾人睇唔起及受白眼：“耻笑亚视嘅金句有好多，如‘前世做错事，今世做亚视’，就连亚视出身嘅张家辉都咁话啦，哈！就算我前世做错事，喺亚视𠮶4年都还晒啦。年少一炮而红，难免心高气傲，个人仲有啲寸，对于人哋睇唔起自己，只会同自己讲‘好快就会跳出框框，一定会红’点知𠵱家都半红不黑，踏入中年仲寸乜鬼，只求不断有进步。”

古淖文跟影帝周润发拍过电影《赌城风云》。

古淖文跟《亚洲星光大道》战友相聚，当中包括冠军罗力威及陈蕾。

古淖文系2009年亚视《亚洲星光大道》第5名兼“台风奖”。

华星清盘打回原形

另外，2001年华星唱片清盘时，虽然有“一哥”古天乐“陪葬”，但梁浩贤仍然伤到入骨：“以前有公司时，每次活动都有助手及保母车，仲Set晒头行出嚟型到爆，感觉好似好得㖞！冇咗唱片公司后乜都冇，连歌迷都越嚟越少，突然间戆居居失咗方向，甚至开始抑郁匿埋屋企，但都hea咗10年，期间做吓pt DJ炒吓散‘揼波钟’，直至冇晒积蓄先肯死心转行做生意，赚到啲钱后又唔想有变动，不过始终心系唱歌，得到吉吉鼓励，点都要尽力试一次。”

2001年华星唱片清盘时，梁浩贤仍然伤到入骨。

梁浩贤当年获华星新秀金奖，有10万奖金。

梁浩贤(左2)和徐天佑、余文乐及周永恒是同年新人。

浩贤当年都有啲粉丝。

回顾过去，浩贤有好多难忘点滴，最后悔当年太被动，唔识得把握受捧机会：“试过录音迟到；有次仲傻到以为半夜两点出街嘅《音乐新干线》系直播，错过咗下昼两点嘅录影又被闹，去Event影大合照时永远企侧边。我又成日去老友谭俊彦（Shaun）屋企，‘笠’咗佢顶帽及佢件衫嚟着，反正佢有咁多衫都唔觉眼㗎啦，直至见报后阿Shaun 莫名其妙，点解我身上套衫咁熟面口嘅？谂返都好笑。”

梁浩贤及“光头仔”王嘉明成为《中年2》战友，笑言当年都系做到唱片公司执笠。

梁浩贤鼓起勇气再战歌唱比赛。

当年梁浩贤跟邓健泓、梁咏琪、李彩华合唱。