【曾智华专栏】明天只捧“坚又威”

马名，绝对反映马主心态，有的与人为善，有的优雅，有的谦虚，有的暴发，有的充满霸气，有的沉溺政治，有的迷信⋯⋯乜都有。
　　
最近黎昭升马房有只新马，名“喜报围家”，好渣波，出五次，冇赢、冇入位、冇升班不止，反之，三班起步，跌落四班，由六十五分减到五十七分。照计以黎昭升背景咁猛料，冇理由会入只咁差新马㖞，真难明，次次输三个几到八个几马位，近都唔近吓。
　　
某某资深马主一嘢笃正，笑笑口话乃因改错名：“碌Sir，只马改错名呀！‘喜报围家’真系唔汤唔水，唔知想表达乜。真㗎，我就听到Call马员大大声嗌‘起步为艰’又大漏，弹出包尾⋯⋯事实，佢近三场冇次出闸顺利㗎！”
　　
好，讲讲明天，小弟一年一度入场！点解？因大群圣若瑟书院师弟仔，用校徽颜色——绿及白，组成一个赛马团体——Green and White Racing Syndicate，从澳洲引入一匹自购新马，三岁，评五十二分，四班起步。
　　
叫乜名呢？个赛马团体用英文译成中文，正是“坚又威”（反映幕后心态？），故此，第一匹马就叫“坚又威”！听落系咪好劲咁呢？
　　
周日报跑千二米，练马师姚本辉擅长操短途马，唔好唔出，故此我一定捧场，何况有着母校的感情？
　　
说来此马的父系及母系，名字也畀人“快过火箭”之感，绝对唔嘢小！父系叫Smart Missile，母系呢，则叫Twin Star Rocket。
　　
讲起圣若瑟书院旧同学（即圣Joe仔）夹分养马，小弟三十年前也试过，做埋经理人。不过，冇晒瘾，养咗只“好易赢”，结果一场都未赢过就退役。个别组员由热烘烘到冷冰冰，后期搞到唔愿再夹钱交养马费，最终唯有散Band。
　　
希望“坚又威”真的又坚又威，明天冲W！