【曾智华专栏】有市场，有人抢

年轻打工仔有自信，绝对好事，但不少过咗火，变“志大才疏”，而就算有才，也不懂得有步骤去显露，结果跑输同侪。

昔日管理香港电台第二台，年轻人电台，当然鼓励创意与胆识。但个别年轻同事误会乜叫胆识，以为拍吓心口乱来就叫胆识。

试过几次啼笑皆非。其中一次最经典，遇上毫无分寸者，拍门直闯我办公室就话：“碌Sir，你畀我同你拍档做《晨光第一线》啦，肯定表现会好过车淑梅！”

我好认真咁矋住佢问：“请问你凭乜？”佢即时哑咗⋯⋯口窒窒：“我年轻，有新意，有冲劲，唔怕挨，只要有机会，就会表现你睇！”其时这位年轻人只在做三线时间（即冇乜听众，错咗冇人知，最佳用来训练新人）。

“XXX，用足球比喻，你只是丙组仔。《晨光第一线》系打英超，你现今连丙组都踢到普普通通，竟够胆要求踢英超？仲话会劲过车淑梅？究竟你屋企有冇镜？冇？我送块镜畀你好唔好？”

做电台，除非在外边已属劲人猛人，否则，所有主持皆由基层做起。当你有表现，自然有人赏识，可能外边挖角，可能内部提升，一切皆无符碌也。

今日谂起个儍吓儍吓DJ，因昨晚与《过时．过节》导演曾庆宏晚饭，讲到做新导演的坎坷。电影圈，大量人发梦做导演，但拍套戏，最少几百万元，若你冇好业绩，边个敢信你？试过有投资者以为识写影评者，应拍得出好电影，结果蚀到摊摊腰。

曾庆宏犀利，一方面游说到电影发展基金资助，再加自己投资才掂。

现实社会，你一套掂，有市场，自然有人送钱上门，请你拍第二套。下一套，不用再小本制作（打丙组）了，佢可会挑战“英超”呢？