黃庭桄-專欄
2024-03-22 11:01:42

【黃庭桄專欄】爭埋單

每次跟一大班朋友吃飯,到了結帳時刻,都是尷尬的場面,亦會見到不少眾生相。
  
如果敵不動,我不動,難道任由侍應呆企嗎?侍應會識趣地問:「請問係邊一位老闆埋單?」然後瞄向衣著比較身光頸靚的某一人。
  
其時總有人自動掏出腰包打破僵局,再看他闊綽的程度。也許他會說:「呢一餐等我嚟,咁難得可以聚首,唔好同我計,到下一餐就由你哋請客囉!」
  
我其實更喜歡聽到以下的對白:「總共食咗千二蚊,我哋六個人,每人二百啦,可以畀現金或者PayMe都得。」均均真真,誰也不欠誰人情,不用請來請去。
  
很多時候,我會見到有些「度縮友仔」,當有人掏出銀包後,才會作狀伸手入褲袋拎銀包,並惺惺作態:「哎喲!乜咁客氣呀?等我嚟埋單吖嘛!食咗幾多錢啫?我夾返。」他明知道對方會好大方,定必豪氣婉拒,咁又可以慳返一餐。
  
一個人搶著埋單,不代表他比同枱食飯的人更富有,只因為他重視每一段友情,希望大家都能夠盡興,乾一杯恭祝友誼,不用斤斤計較那一千幾百元。
  
我試過很多次,當拿出錢準備結帳,會被友人「粗暴地」從侍應手上搶去帳單,並喝止侍應:「你唔准收佢錢,呢張單,一定係我埋!」如此爭來奪去,活像玩詠春黐手,往往弄得侍應夾在中間,左右為難,相當尷尬,不知如何是好。
 
為了避免上述的「衝突」場面,我通常會在上甜品的時候,選擇離座,扮作去洗手間,然後靜悄悄走到收銀處結帳。

能夠請客,其實算是一種福分,Cheers!