【黃庭桄專欄】八仙賀壽

普天之下，無奇不有，不同的宗教派系，各有看家本領，這邊廂有六𡈼神功，那邊廂是道家正一派扶乩，還有周易卜卦、奇門遁甲問事等等，都有令人嘖嘖稱奇的本事。
　　
一個師傅級人馬，偶爾露兩三下功夫，已能令信眾心悅誠服，拜入門下。
　　
可能進貢的香油錢利是，數目不菲，往往誘使一些濫竽充數的人，冇料扮四條，扮成師傅，牟取暴利。
　　
能否替客人消災解難？十個可能有兩個撞彩成功吧！可以超度亡靈嗎？「鬼」知咩！有時做一場大龍鳳，開天殺價十萬八萬元，依然大把人自動送上門幫襯 。
　　
誰是神棍？誰是神功蓋世？天知地知，可惜善信們不易分得清楚，落得蒙受金錢損失，運氣衰上加衰。
　　
我見過有算命師傅，聲稱能捉鬼，每捉一隻，盛惠十萬元，但他替我朋友的關公像開光，卜了十幾次杯，也未能卜出聖杯，開光失敗告終。也有師傅提供驅鬼服務，其實自己最怕鬼，只會推弟子出去處理。
　　
最近一位女師傅，因替命案死者進行招魂儀式，聲名大噪，到底有冇料到呢？眾說紛紜。
　　
近日一段她擺壽宴的片段流出，不禁令人失笑，只因她坐在台中央位置，八位弟子「上僮」，請八仙上身，圍著她手舞足蹈，司儀唸出幾句口訣，聲稱請來了八仙為女師傅賀壽。八仙喎！竟然會下凡替一個凡夫俗子賀壽，你估好得閒咩？你是王母娘娘嗎？你受得起嗎？西洋鏡就此現形。