【黃庭桄專欄】賭運

我有一個同事，多年來看過不少相士，得出的結論都是不謀而合，指她命格欠橫財，不宜投機買股票，即使買馬都不會贏大錢，只好疊埋心水賺正財。
　　
可是她熱愛賭錢，逢賭必啱，但又不得不信邪，十次買馬，她至少輸九次，偏偏她也不會氣餒，日馬輸了嗎？夜馬又會捲土重來，抱着有賭未為輸的心態，拒絕相信自己條命欠賭運。
　　
「好心你就咪再賭馬啦，每次輸兩三百元，一個月就會輸二千幾蚊，不如攞嚟食咗佢無咁嬲啦！」
　　
她滿有信心，說買馬只為挑戰自己的眼光，中不了，只因運未到，彷彿代表了全港所有賭仔的心聲。
　　
時為星期三夜馬日，就趁酒樓有電視可收看賽馬直播，我跟她打趣說：「你既然不肯承認條命欠賭運，不如咁吖！就拎跟住一場馬做實驗，總共有十二匹馬跑，你揀八匹出來，我就買餘下四匹馬，睇吓賽果如何？」
　　
單以或然率計算，八匹馬任何一隻跑第一名的機會是三分二，勝算甚高，她應該好難輸這場牙骹戰。
　　
當所有馬匹跑完一千二百米，悉數衝綫後，她當下啞口無言，只因跑出的頭四名，正是她沒有揀選的四匹馬，還能不認命嗎？「你不如以後場場馬都揀剩四隻出來，我贏咗錢之後，最多請你食飯啦，哈哈！」
　　
她又不禁告訴我，買了幾隻股票，一買之後就開始跌，從來未升回入市的價位，長年都在蝕錢中，夠晒陰公豬。
　　
從五行八字中，其實很容易批算出，一個人命中有沒有偏財運，都是那句：「不賭便是贏錢。」