【曾智華專欄】「撼天鐵翼」開飯喇

上周日賽馬，小弟隱隱聽到如雷噓聲（當然夾雜好多震天粗口聲），因為熱門捧場客輸到瞓街，屍橫遍野。點解？首先，「練馬師王」大熱蔡約翰只交出一W兩Q，於是買隔夜的二點幾倍的粉絲，全部釘釘。
　　
呢下並非最傷，最傷是馬會開「騎師王」，只得一點一六倍，信心爆棚到似俗語——唔得我畀個頭你當櫈坐！結果，「軟硬鞭」潘頓再玩半失蹤，連場大熱死下一隻，死下又一隻，最終令以為佢會玩「硬鞭」的捧場迷，全部喊到收唔到聲，連買十蚊賠個六都「唔開」，死未？
　　
當日另一令人火滾之高手騎師為布文，只交出一隻兩倍大熱W，其他六隻遊馬河，表現與早前初來港申請長駐時，判若兩人。跑馬就是如此？
　　
幸而馬迷又唔算完全激鬼死，因見到何澤堯墮馬復出，已全面恢復信心，末段由馬縫中如飛殺上的狠勁，並未消失。
　　
另一今季本來發霉的練馬師丁冠豪，突然發威起孖，但至今仍只得6W，距離畢業甚遠也，餘下不足三個月追，危險。
　　
今次快活谷，我專注研究第五場三班千二米賽事。
　　
首先飛起「加州一寶」（未在狀態）、「幸運旅程」（季初連W三場，由五十七分加到七十三分，要有排回氣，減夠分才能出擊）、「德薩斯」（不知競賽為何物，有排學）、「風繼續吹」（未減夠分）、「迎樂」（前仗鍊盡出擊W，加五分，要先唞唞）。
　　
以上五隻外，其餘全部有機，故此，可五隻買複式二重彩，五蚊注，一百蚊成本。
　　
另外，WP再買「撼天鐵翼」。此馬本為苗禮德寶藏，散倉後拉到黎昭昇馬房，唔夾，三場輸清光，馬主即拉倉。轉由韋達訓練之後，三場兩Q一P，今晚應該到時候開餐喇。捧啦！