【曾智華專欄】攞命減肥，驚人意志

已經一段時間未遇上一部全場觀眾唔捨得離場的電影，剛剛再遇上，全場在銀幕左邊播出工作人員名單、右邊播放主角攞命減肥日程時，默默由衷地講個「服」字，此片的導演及主角賈玲，實在有驚人的意志。
　　
散場步出，後面一位丈夫向太太講：「唉，搵食拍戲啫，使唔使搏到咁呀？」
　　
講乜？正是上月在內地破盡春節票房紀錄的勵志片《熱辣滾燙》（《YOLO》），英文—— You Only Live Once，意即有今生，冇來世！
　　
此片內地口碑轟傳，仍在狂收，但上周香港上畫，根本冇乜戲院放映，我搵到的黃埔戲院，也只一日放一場，嘥料！
　　
《熱辣滾燙》冇政治成分，亦冇濃濃的內地色彩，反之充滿四海皆準的人性，絕對觸動人心。
　　
劇本改編自2014年日本電影《百元之戀》，乃賈玲第二部自導自演電影。這位四十一歲的電影奇才，肯定將寫進國際電影人物歷史冊，因出道第一部電影《你好，李煥英》，票房已爆個石破天驚，狂收8.1億美元，乃電影史上第二高票房女導演。
　　
這部《熱辣滾燙》也真不得了，至本月初，賈玲兩部電影票房已破百億元人民幣。
　　
你有冇點點好奇心？想知點解？簡單，入場啦！睇完一定歎句：「冇得唔服！」
　　
此片描述一個重二百多斤、毫無鬥志的躺平大學畢業生，種種經歷之下，以驚人意志減掉一百斤（有多大塊的肉！），再成功踏上擂台參與拳賽。
　　
賈玲為拍此片，先增肥四十斤，再在教練團地獄式操練下，大半年憑健身減肥、操肌、練拳，變成完完全全另一個人。
　　
如此又導又演又攞命式減肥，究竟賈玲是個怎麼樣的人？想落真的有點恐怖！拍完此片後，佢體重會反彈幾多呢？