【曾智華專欄】典型谷氣大馬主

馬主有好多種，最受練馬師歡迎的，當然是「美麗系」的郭氏家族那種，不停買呀買，一隻唔得，換第二隻，不少馬房都有「美麗馬」，不但撞埋一日出，更不時同場會一齊出。若果馬會有大量郭氏家族型馬主，咁就唔使擔心到震晒嘞。
　　
不過，現實中並不多。幸而馬主界正如官場——有人辭官歸故里，有人漏夜趕科場，如此才會生生不息，延續賽馬事業。
　　
其實就多年所見，辭官者的際遇及心態，數十年如一日，小弟乃其中之一。上周與一位前大馬主T叔晚飯，大家際遇相近，佢一講起養馬，就呻到樹葉滿地，擺明谷到上心口。
　　
T叔於上世紀八十年代到2000年，生意因香港經濟大好，財源滾滾，搵錢易過借火，於是想一過其馬主癮。
　　
「碌Sir，我當年對馬圈一切無知，只覺得做馬主好威，可以呼朋引類，帶齊親朋戚友及生意拍檔入場拉頭馬，幾咁風光！」
　　
結果，佢揸住近千萬元做本，託練馬師買馬，一買幾隻，每隻百幾萬元。
　　
「坦白，我乃生意人，當然不會天真，早早預咗畀練馬師斬三兩成馬價，應該嘅，不過，大佬呀，你唔好點到我陀陀擰，冇晒面吖嘛！」
　　
乜事？正是大部分水魚馬主的經驗——練馬師話隻馬唔使買時就爆大冷，令親友以為馬主收埋食；好嘞，到練馬師話「得」嗰次，當然Call齊老友瞓落去。大鑊！原來又瓜直，變替人「孭飛」！又畀老友M到飛起，怎不火都嚟？
　　
馬主T際遇，N咁多人領教過㗎！
　　
今日沙田賽事，我有興趣研究一隻馬，賀賢三班跑千二米的「攻頂」，獲優先出賽權。此馬上季跑過兩次沙田千二米，一次W，一次包尾。今季第一次再跑千二米，一於買十蚊，睇佢W定冇影！