【曾智華專欄】英文水準齊齊墮退

老友H叔退休後無所事事，終日攞住架小米手機（佢話愛祖國，用國貨，慳啲唔用iPhone），在旺角太子街頭四圍獵影。經常捉到不同部門「大食懶」，講咗唔做，又詐盲詐聾，除咗派牛肉乾最積極外，大部分街頭不合理事情，負責部門多數都用「我睇唔到，我睇唔到⋯⋯」態度，除非有人唔怕煩，正式投訴。
　　
昨日佢又傳來一張經常陣陣尿味的街角告示，由康樂及文化事務署發出，有蓋章，意即上司睇過（Approval After Vetting）。
　　
「碌Sir，呢張嘢又搵唔到錢，又冇乜好玩，應該並非呃人假貨。事實呢處啲尿味實在好惡頂，相信不少人投訴後，阿Sir才勉強出手做嘢！」H叔分析：「不過，騎騎騎，小弟都算讀過吓大學，有基本英文文法及翻譯常識，相信康文署啲阿Sir都有啩？下級唔夠班啫，批出嘅上司，都應該有一定水平吓嘛？」
　　
講乜？正因佢一睇張告示，就知有問題，因告示寫：「嚴禁隨處便溺，違例者會被檢控！No Urination. Offender will be Prosecute！」
　　
我將此告示掟上百厭星群組（有大狀、傳媒老頂、醫生、退休高官、教授⋯⋯），反應「哄動」（平日悶到抽晒筋）！
　　
最多人玩的，當然是「Urination」代表乜？因與便溺好似冇百分百等號。
　　
其次，文法當然錯晒，中學生也應知。
　　
較好笑為馬王P，佢以賽馬來形容香港的英文水準：「碌Sir，簡直急劇墮退呀！」
　　
Y醫生接口：「冇法，如今夠膽上國際傳媒頂吓的，來來去去得葉劉。你叫傳統愛國陣營班大哥大姐『挺身而出』？個個要耍手擰頭。剛剛在英文台聽見某資深愛國女議員論《23條》，答：『HongKong will become more safer！』」
　　
當大家水準都下降時，就冇「水準高低」問題啦。