【曾智華專欄】做咗功課才好入場

前日早上，手機彈出訊息，老友L醫生問：「碌Sir，今朝放假，想睇長者早場，有乜好介紹？」
　　
L醫生早年乃文藝青年，喜歡閱讀思考，與小弟呢類俗人活在不同世界。
　　
幸而近年睇得電影多，加上有老婆大人點醒，我也略懂欣賞非商業性的高質素電影。
　　
「介紹兩套，皆在各大影展得到極高榮譽，但香港龍頭戲院唔上，要睇就去百老匯電影中心啦，《新活日常》及《特權樂園》。建議未睇前，先上網了解電影導演希望傳遞的訊息！」
　　
有此提議，因普羅觀眾矇查查，以為得獎電影一定是具「商業吸引性」，咁就可能錯晒。
　　
舉例，我睇《新活日常》時，正正有位阿叔在後面鼻鼾大作，未到十五分鐘已同周公個女打得火熱，直到劇終著燈才紮醒，大大聲講電話：「老婆呀，套戲悶到抽筋，唔知講乜鬼，淨見個日本大叔日日不停洗廁所⋯⋯」
　　
事實此片放映途中，也有十個八個長者中途離場（票價平，可以乜都睇）。
　　
《新活日常》相信將會奪得本屆奧斯卡最佳國際電影獎，故男主角役所廣司（日本影帝）已宣布會親身出席，睇嚟應該實食冇黐牙嘞。
　　
另一套建議L醫生睇的為《特權樂園》，連最佳英國電影榮譽也掃下，絕不簡單。
　　
名導演Jonathan Glazer「十年磨一劍」，今次出招，令人驚歎的是：「噢噢，原來可以用如此不尋常角度去拍二次大戰殘忍無比的集中營，真是意料之外！」
　　
全套電影沒有殘殺、折磨、虐待、燒屍⋯⋯有的只是描述一個正常溫馨家庭的互愛。
　　
點解畫面咁溫馨，但你又會睇得不寒而慄呢？這正是導演及音響設計師Johnnie Burn的不凡功力，故贏得業內的一致掌聲。