【曾智華專欄】大佬唔好啩？

今日標題是否很吸引？你一定在想，佢叫邊個做大佬呢？又有乜要求大佬唔好啩？
　　
等小弟細說因由啦！
　　
話說兩個月前，約「快樂傳媒老是佛」到相熟的鰂魚涌嘉里中心「富嘉閣」晚餐，食到中途，負責人李文基師傅（百分之九十九似足二十年前李嘉誠的樣子）笑笑口，攞咗塊古董龍躉皮出現：「碌Sir，呢塊嘢好珍貴㗎，剛夠十二個人食，膠質超勁，燴鮑魚一流，我唔留啦，你攞去做善事啦！」
　　
好喎，召集為食善長乃我強項！翌日立即通過旗下地盤公布。閃電咁快有人舉手認捐三萬元，再付費食一席「古董龍躉皮」盛宴。
　　
基哥知道後，來電話：「要2月底前食㗎，之後我放大假，唔知放幾長㗎！」
　　
吓？咁即係點？退休？拉閘⋯⋯冇理由喎，咁鬼多熟客，生意唔憂，點解呀？
　　
四圍打聽，富嘉閣真係將有大變動，但日期及最終如何，仍在研究中，據聞大老闆兩代有不同意見，在拉鋸。
　　
此店面積相當之大，若非由一個人決定點用，必有不同意見，包括𠝹開做幾間精品餐廳，吸納年輕客路，這想法肯定有參與決策者提出。
　　
不過，若咁做，基哥當然不會上馬再管，一方面年紀唔細，另一方面，佢乃「鮑魚一哥」首徒，最擅長做粵菜，若搞到只得細細間或改做甚麼Fusion菜，咪變英雄無用武之地？
　　
無論如何，決定未落，但極大機會將會轉型，若不，或先結業再研究。小弟大班為食老友一聽此消息，當然冇晒癮，唯有立即舉手排隊，幾大收檔前歎返幾餐。個個指定要食基哥最拿手的順德拆骨魚雲羹、煙燻樟茶鴨、墨西哥大鮑魚燴魚唇、古法砂鍋燜頭腩⋯⋯
　　
我真係一面寫，一面流口水呀！