【曾智華專欄】馬會入市是重要訊號

股市跌到「淋冧冧」，我日日畀人問：「碌Sir，死啦，再咁跌落去，會否渣都冇㗎？係咪應該未變零前清倉呢？」
　　
大佬，點答呀？啲錢你嘅，若我叫你揸/沽，衰咗一定賴我（冇人會賴自己豬頭炳的），所以，幾大唔答，你自己決定啦。
　　
不過，小弟點做，就可公開：「我乃股神巴菲特忠實信徒。點解？因冇人投資股票夠佢叻，講完。所以，有兩項紀律，長年緊跟：一、堅守價值投資法。只買有實實際際業績、資產及前景的股票，絕不買『吹水股』，你講到天花龍鳳？留返你自己好了；二、別人貪婪我恐懼，別人恐懼我貪婪！」
　　
個人買賣股票幾十年，乜都見過，包括指數跌到「鼻哥窿冇肉」，又或升到以為坐上火箭，從此再冇地心吸力。
　　
股市一如馬場、賭場，從來九成人蝕、半成人打和，賺的是另外半成做莊的幕後決策者。
　　
我玩股票，只以「玩」的心態，絕不瞓身。真正瞓身的投資，只有自住單位！
　　
好嘞，答返班「騰雞族」究竟應否出/入市？
　　
有個訊號極其重要，就是馬會財神爺會否入市掃港股？馬會存在，好多「社會功能」，包括製造就業機會、穩定社會情緒、收取天文數字稅款及善款，此外，仍有一樣，非常時期才出招——護盤。當股市跌個四腳朝天時，馬會就會揮軍入市，一來執平貨，二來穩住個股市。
　　
每次馬會入市，皆Timing精準兼中短期例必有斬獲，大家留意可也。
　　
今晚玩泥沙，唔好玩都要玩，一於研究二班1650米。複式二重彩及Q膽選「禪勝寶駒」，此程專家，隨時都可起筷，腳拖「保羅承傳」，鐵馬，乜地都得，跑極唔殘。冷選兩隻，「柏林探戈」此程贏過，減夠分就郁手；「敏捷神駒」唔知乜料，拖埋！