【曾智華專欄】劇情夠怪，殺個痛快

電影，劇本就是靈魂，若冇好劇本，導演及演員會飛都冇用。所以，創作劇本一定要夠吸引，吸引觀眾追下去。
　　
不過有一種電影，劇本可以幾世沿用，用完又用，開場已知結尾也冇問題的，正是神秘高手儆惡懲奸電影。
　　
呢類劇本中學生都識寫。首先是有位絕世武功高手，一生打打殺殺，非常厭倦，決意歸隱，回到小鎮過平淡生活。但受惡勢力刺激（恐怖分子、大賊惡棍、毒販強姦犯⋯⋯），決定挺身而出，重出江湖，將惡勢力連根拔。
　　
角色設計，主角正義到爆，滿滿英雄感。惡勢力頭頭及集團則衰格到冇人有，人見人憎，主角誓要將之殺而後快。
　　
好嘞，跟住睇正義如何戰勝邪惡，過程必定殺個落花流水，血肉橫飛，驚險刺激，最後正義之士全面勝出，惡棍邪人全被殲滅，大快人心，個個開開心心走出戲院，發完一場美夢，重新回歸正邪不分的現實社會。
　　
今期上畫的電影《蜂神惡殺》（《The Beekeeper》），正是這類片的典型。
　　
正義之士由積遜史達頓主演，邪惡勢力就是專騙無知老弱的電騙集團。這個設計可說與時並進，不再是甚麼俄羅斯或中東恐怖分子。
　　
此片最可觀之處，為動作暴力大導演David Ayer盡情投入，睇得出佢將個人熊熊烈火及爆炸性能量灌入電影中，再由積遜史達頓幾乎瘋狂地場場將壞人殺個痛快。
　　
呢類電影千祈咪講邏輯，尤其此片，因描寫年輕電騙集團頭目母親竟是美國總統，而父親就是中央情報局局長，大話西遊到衝出宇宙咁誇張。
　　
好呢類片者入場啦，唔使用腦，滿足晒「殺壞人」的欲念，恍似狂灌汽水，將胃氣猛力一噴而出。