【曾智華專欄】澳門馬會「死因研究」

澳門馬會4月1日收檔。消息已傳咗（大家早知是堅的）成年，只不過等到本周與澳門內部有齊默契，才正式宣布。
　　
周二本報新聞標題：《提早18年解除合約，專家：難敵賭場競爭》。當然唔係啦，若果跑馬搞得好，成氣候，只會與賭場業務一齊旺，相得益彰，令賭客更多嘢玩！
　　
咁其實死喺邊呢？等我講啦，乃畀香港特區政府及馬會聯手陰乾（「謀殺」！）。不是甚麼刑事罪行，也冇啱或錯，任何人做馬會管理層，皆會游說政府齊齊玩死澳門賽馬。
　　
澳門馬會「之死」，乃因開波時搞得太成功，全盛日子竟然一周跑三日，每日十四場賽事，一年三十幾萬人入場（不少為香港人），2003年竟達到九十一億元投注額！
　　
本來若澳門馬低調地跑，認香港馬會做大佬，彩池點搞，大佬點話點好啦，總之有財齊齊發，畀條路細佬行吓就掂啦，咁就會冇事。
　　
點知澳門馬開檔後，搞到成行成市，扯去大量香港馬迷投注額，到暑假情況更洶湧！香港唔跑我狂跑，搞到香港馬迷仆過去賭，漸漸出現慣性，咁點得？
　　
另一「死因」，為不少香港被吊銷牌照的「問題騎練」，竟在澳門「復活」，大展拳腳。
　　
一切一切，令香港馬會感到尷尬又不安，種下必須「陰乾」澳門賽馬的決心。馬會每年納稅及善款加提供就業等等貢獻龐大，一旦唔掂，影響深遠，遂決定將澳門賽馬趕盡殺絕。單單政府立法不准在港投注海外馬，已經立即一劍封喉！
　　
明日沙田馬場舉行國際一級賽，平磅，老虎當然現真身。睇個局，應是兩隻「美麗」——「永遠美麗」與「美麗同享」夾擊「遨遊氣泡」之局！兩隻「美麗」已摸頂，「遨遊」則仍上緊，做膽可也！