【曾智華專欄】首次包場一開即爆

上月底手痕痕在此寫咗篇《跟住碌Sir去睇戲》，因近兩年睇咗不少非常出色的港產片，有質素，有訊息，導演個個用心，又充滿誠意，技法也遠勝多年前的屎尿屁及無厘頭柴娃娃導演。故覺得有機會同大群志同道合影迷老友一齊睇，睇完一齊分享感受，定必是人生大快事。
　　
文章刊出後，當然有熱水（支持你！快啲搞！），也有冷水（包場咁易？冇反應，蝕死你！）。
　　
小弟乃急先鋒型人物，喜歡開創，即搞搞震，兼且視失敗亦等閒，因早年參與體育活動，近年不停投資與投注，也知世界冇必勝。若你成日等到必勝才出招，可能會等到發霉。
　　
N年前與文壇長輩蔡瀾閒談，講到監製多部電影經歷過的困難，佢講出個人的信念——試就五十五十，唔試就零雞蛋！
　　
意即凡事冇必勝，但唔試就輸硬！
　　
我絕對贊成，故此一有意念想做，即會計計輸唔輸得起，若唔會死人就去馬，以免後悔。今次包場睇戲亦如是，死晒都只蝕幾千蚊，在我的「輸波」射程範圍內也，唔入肉。
　　
一話做，就郁手。結果講都唔信，一個星期內，由搵影院（多謝高先幫忙），決定放邊套（近期最喜歡的《富都青年》，影帝吳慷仁演技驚人），公開報名，找酒家作影後聚餐（米芝蓮推介的西環德記潮州菜）⋯⋯全部搞掂，順利安排下，一開即閃電爆滿。
　　
電影播完後，我與Winnie（高先老闆）作影後分享，在座觀眾也紛紛講出感受，包括資深新聞人陳早標，原來電影令在座者全有觸動。
　　
一炮順利打響，下一套也是影帝吳慷仁作品，香港電影發展局參與製片的《但願人長久》，此電影未上已大受業界關注推薦，大家留意！