【曾智華專欄】搶錢呀！

資深馬迷一定試過被「搶錢」經驗，即係點？
　　
即係明明睇中一隻大冷或半冷馬，當然買WP啦，最開心係隻馬行圈時賠率冇郁，心諗：「嘩嘩，若果跑出就得米矣。」
　　
通常馬迷會在入閘前落注。經常發現入閘時的賠率，竟與出閘時不一樣，即冇咗一大截！意即有幕後人在入緊閘時才郁手，提防畀人跟到，以免分少幾蚊或幾十蚊。
　　
上周日賽事，本欄貼第八場三隻馬——「怡心聲」，「閃電烈馬」及「攻頂」。閘前賠率分別為十一倍、七倍及十二倍。我每隻買十蚊W，共三十蚊，隻隻有得分，跑出邊隻都贏。
　　
結果「攻頂」W出。嘩！有成十二倍噃，仲唔肥過肥豬仔？點知⋯⋯喂喂，搶錢呀！因過終點後，電算機打出得八倍，即冇咗三分一，真真頂佢個頭槌，擺明又有「先知」臨出閘才大手落注！
　　
唉！都好啦，希望大家都似小弟咁，投注三十蚊，收返八十五蚊，有五十五蚊利潤，算和味㗎喇。
　　
好！向前望！
　　
全個馬季高潮今晚展開，首先是「國際騎師邀請賽」。十二位參賽者，雖曰位位精英，但仍有卡士之分。香港代表除潘頓外，差半班。
　　
我會點買？場場買騎師！一於五串十複式二重彩，選以下幾位：一、莫雅，毫無爭議的當今天下第一高手，全球馬場及所有路程皆難唔到佢，騎任何馬都跑高半班至一班；二、麥道朗，唔使多介紹，你睇佢點贏「浪漫勇士」已拍案叫絕；三、馬昆，上屆冠軍，當今歐洲冒起最快的明星，只二十五歲，大把前途；四、杜苑欣，馬昆太太，甜姐兒，陣上鬥志驚人，乃英國一季內勝出最多頭馬的女騎師（2021年，一百七十二場）；五、潘頓，肯定今晚會出「硬鞭」嘞，若仍有自尊心及英雄感，點會衰比全球同業睇？