【曾智華專欄】廖康銘「例湯」勁好味

近日與馬迷老友聚餐，已去到人人MM聲境界，M乜？M「軟硬鞭」潘頓及M埋馬會競賽小組班「盲公陳」，呢鋪真係佛都有火！
　　
不過，你M還你M，本周三一哥又再施展極品走位武功，雖則「騎師王」大熱，但再表演W又冇，Q都冇大法。
　　
其實馬會操盤手都應該搵窿捐，鋪鋪計算「軟硬鞭」做「騎師王」，捧到大熱，但鋪鋪撼頭埋牆食白果，咁瘀，使乜高薪厚祿請你做操盤手？不如幾十蚊個鐘搵街邊阿叔做啦。
　　
出完氣，要讚吓人。讚邊個？正是今季新到港的澳洲練馬師廖康銘。讚佢乜？「例湯」勁準也。
　　
大部分練馬師，皆會在賽日早上發放馬房貼士畀旗下馬主，多數命中率普通，故圈內人稱之為「例湯」，可參考而毋須認真。
　　
不過，廖康銘第一煲例湯，認真犀利，帶挈我一個日本晚餐！
　　
乜事？正是周三廖廄出三匹馬，佢就畀咗三場自己馬貼士。第一場「領航聖心」排尾，即冇乜機。但第二及第三場的「東風壹號」及「妙算歡騰」則實牙實齒排第一，顯示信心。結果兩隻皆W，尤其「東風壹號」，更贏到甩晒冇得揮。
　　
呢鋪益我W、P過關，嗌到拆天，開心。
　　
明日跑快活谷日賽，過往紀錄，例牌熱倒冷爆，難以解釋。
　　
我集中研究兩場一千米鬥快賽事。第四場四班賽，水準全部普通裝，冇隻有絕對冠軍相。選三隻！「奇寶」專攻此程，前仗只輸短頸位，今次夠鐘起筷。「耀寶駒」為苗禮德留下的三歲質新馬，未用過，轉黎昭昇馬房操足，應見真章。此外，潘頓衰極都要拖佢隻「勁無敵」一票，以免畀佢壞大事！一於三隻Q、PQ投注！
　　
另外，第七場一千米，我買「平海歡星」，佢每逢季初就發難！