【曾智華專欄】由粗鄙爛撻到⋯⋯

剛剛上畫的《尋根女團》（《JoyRide》）乃一套性喜劇，由四位黃皮白芯華裔及韓裔年輕女演員任主角，非常狂放，鹹到飛起，百無禁忌（但卻冇裸露場面），性器官隨口而出，滿天飛，略為保守的觀眾必定皺眉頭，覺得——話晒係女仔，乜咁淫賤都得㗎，啋！
　　
片中四名女角十足十典型美國College Kids，剛入大學一類，開始冇王管，只有同輩互相影響，於是煙酒軟性毒品一齊「隊」（香港的大學迎新營也有類似？），再加埋性開放。
　　
你問我，是否只在現代美國才如此？小弟可以用親身經驗話你知——絕對不是，半世紀前已如是！我點知？親身目睹也。
　　
1975年飛到美國讀大學，親身大開眼界！宿舍之內，男生女生可以亂作一團。與我同房的夏威夷仔生性風流，每逢周末就帶不同女性回來大被同眠，搞到鬼殺咁嘈。
　　
我問佢：「嘩！你咁都得？」
　　
佢就答：「有乜唔得？你情我願，Just For Fun！Hang Loose Man！」
　　
呢丁友仔又自種大麻，分發比宿舍同學任食，故此非常好「人緣」。
　　
不過，美國社會就是如此，年輕人有浪蕩不羈一面，但同時全國宗教氣氛濃厚，不少大學時期癲癲喪喪者，畢業後就會慢慢回歸傳統價值觀，乖乖結婚組織家庭，開始博命工作，以負起供車供樓重擔。
　　
當生兒育女後，就更力求自己做一個規規矩矩的父親或母親，以作下代兒孫榜樣。
　　
其實不少荷里活電影也宣揚這種意識，《尋根女團》一樣，四個粗口滿嘴隨便談性，又好似乜都冇所謂的喪妹，原來內心深處到最後，仍然自動波回歸追尋純純友情、親情及愛情，兼且嚮往宗教氣氛與境界，希望做一個擁有高尚的情操的正常人。