【曾智華專欄】馬會贊助的準則

周三早上，又夾大疊報紙到地踎茶記歎早餐，聽吓班的士大叔做「時事棟篤笑」。
　　
佢哋個個都是馬迷，馬季唞暑冇本地馬賭，真係「囉囉攣」。幸而馬會安排咗全個暑假有越洋轉播，大家可以食「美沙酮」頂住。
　　
本來8月26日轉播最後一次，然後大家要忍到9月10日本地賽事開鑼，才可以再「踴躍捐輸」。點知馬會好似識變魔術咁，「Ma Li Ma Li Hung」，一嘢又變多個海外賽日，正是明天的德國巴登大賽日及法國隆尚磨坊大賽日，真好玩。海外賽，的士大叔識鬼咩，所以冇得研究，投注只是頂住癮而已。
　　
不過，佢哋當朝講的，竟然是個高層次問題——馬會贊助的準則。
　　
事緣宣傳咗兩星期、有晒場地卡士，以及特首可能出席獻唱的「立會好聲音」音樂會，宣布突然收檔，唔搞嘞。點解？當然係目前時勢搞啲咁嘢，屬「政治不正確」，故畀「大勢力」勸阻或喝止啦。
　　
班的士大叔對呢個音樂會好有意見，小弟聽落又有啲理由。
　　
肥油A ：「喂，高佬，呢單『立會好聲音』，唔多妥喎。」
　　
高佬B：「關你乜事呀，又冇叫你買飛？」
　　
肥油A：「派飛我都唔睇啦，又唔係歌星。不過，你同我場場馬捐錢，有份養馬會，故此，佢點使錢，就關我哋事嘞！」
　　
高佬B：「乜講到自己咁巴閉呀？馬會使錢有規有矩，行政費外，就是行善，做大董都冇得袋㗎。」
　　
肥油A：「你講得啱，行善或公益使錢，我冇意見。但個『立會好聲音』係乜嚟㗎？整乜鬼要贊助呢班議員柴娃娃自娛呢？況且呢種做法，有巴結政治人物味道，唔係好妥噃！」
　　
高佬B：「咦，係喎！馬會究竟有乜贊助準則的呢？呢單嘢冇理由咁決定㗎喎？之前有冇討論過？邊個批㗎？」