【曾智華專欄】小學生議員

議員個個成年，大人大姐，收香港人十萬元計月薪，負責監察政府行使權力及支出，更重要是通過政府法案。法
案一通過就成法律，影響深遠。
　　
立法會議員究竟知唔知自己「任重道遠」呢？小弟觀察，有啲知，有啲唔知，有啲知啲唔知啲，否則個別議員的行為言論，絕不會如此。
　　
「立會好聲音」被取消，好多人冇癮，相信包括特首亦如是，因佢早揚言出席，更分分鐘與民同樂，獻唱一曲。
　　
如今取消，決定由何而來？應該有更高層次權力而來。因為近日部分議員行為，不但被市民詬病，「上大人」看在眼裏，也不得不出聲也。
　　
大家若睇過人大政協開會情況，應知內地對議會百分百認真（起碼觀感如是），冇空凳、冇人瞓覺（香港議會多的是），個個正正經經抄筆記。到表決時，也必定舉手或撳掣。點會似香港班議員，通過法案時，經常有過半議員失蹤咁荒謬？
　　
更離譜，當傳媒提出數據挑戰並作嚴正監察時，有個別議員竟表現「串串貢」，不但不承認錯誤，更責難記者「多事」。
　　
市民看在眼裏，「上大人」看在眼裏，會點諗？簡單——你班「友」究竟仲有冇責任感？有冇紀律？有冇為公眾服務的心？
　　
相信正因太多人睇唔過眼，才搞到立法會「班長」廖長江出手，寫下千字長文，提點議員們要知自己責任，顧及公眾形象。
　　
本來以上兩項，乃做議員的ABC，但如今竟搞到要人用白紙黑字提點並公開，成群小學雞咁，真瘀爆！
　　
不過，奇在議員們不但不自省，反之個別向傳媒呻——班長矯枉過正，該通告也有損立法會形象，畀人覺得議員要畀人教！
　　
教你因你哋唔知醜，冇規冇矩冇履行責任！