【曾智華專欄】空則變，變則通

老友F約會，有密實嘢傾，唔方便去係人都見到的餐館，於是約去一間剛開半年新會所，佢話冇乜人，相當靜局的「新竇」，名HKGTA Town Club。
　　
「喂，我真係聞所未聞喎，唔知識唔識去喎，要着乜衫㗎？會否似Hong Kong Club咁，規矩多多，又要攝恤衫入褲頭，又唔准講電話，又唔准着波鞋及冇領衫⋯⋯㗎？」為免出醜，我問定先。因試過幾次在其他高級會所，畀經理細細聲呼喚：「曾先生，有電話搵你啊，出一出嚟聽啦。」其實係指我唔啱規矩，故主動又借皮鞋，又借領帶，又借外套，以符合非常嚴謹的會所規則。
　　
F一聽：「易啦，畀個介紹你睇睇！」
　　
原來呢間會所成立不久，就在中環新世界大廈二十四樓。咁嘅卡士，當然用英文介紹啦：Hong Kong’s Newest And Most Sought-After Destination, An Oasis of Understated Luxury for Individuals。
　　
嘩，個寫手好有創意噃，可以咁介紹。
　　
睇落去， 哈哈， 認識兩個生字！ 因此Club標榜有「World Class Chefs, Sommeliers and Mixologists」！Chef我識，其他呢？速查字典，原來乃侍酒師及調酒師，即此乃飲靚酒之處。
　　
日子到，殺上去，電梯門一開，已見幾位身材高大亮麗女接待，非常有禮引領進入。
　　
裝修當然設計高雅，重本出擊啦。
　　
F遞上Menu說：「碌Sir，你自己睇睇喜歡食乜啦！」
　　
如此格局，諗住晚餐千五元一位冇走雞。點知唔係，小菜約二百元，套餐三百幾元及六百幾元，好「刻己」噃，咁⋯⋯可能會費好甘都未定！再了解下去，點解呢間Club於半年前出現呢？
　　
F話：「形勢使然！過去兩年大量甲級商廈空置，點搞？於是使出一招——空則變，變則通。因中環金融精英勁多，有龐大需求搵高檔架步傾業務或休息鬆弛，呢間Club咪應運而生囉。聽講專攻年輕行政人員！」