【曾智華專欄】今天開倉選乜倉？

最近小弟成了「當紅騙子」，因各個社交平台上，彈出N咁多我真人照片的「投資網頁」，標題非常搶眼，有張更拉埋李嘉誠父子落水，我哋三個大頭下，寫著：拆解李氏王國的股權布局，買錯永不翻身！
　　
真係好吸引！證明集團主腦都幾有創意，肯定有不少人曾忍不住會撳入去睇，有機會變「水魚」，故騙徒才不停推出「Luke Sir投資大法」去放長線釣魚。
　　
我又點？上月已報警，警方科技網絡罪案組專人跟進調查，但至今仍未收到受害者報案。不過，若再繼續，應遲早中招！
　　
各位，大家成年人，自己要懂執生醒定呀！碌Sir在媒介及網上只有兩種真身。第一，在報章雜誌以真名寫稿；第二，真人真樣真聲在網上出現。以上兩項外，網上的全部假嘢！
　　
好啦，既然咁多騙徒用我名「教人投資」，應該有一定市場嘅。今日小弟就免費發放投資忠告，好唔好？
　　
一、投資多數蝕，若冇九成信心，唔好投資。唔投資即唔會蝕本，立於不敗之地。
　　
二、今天最佳投資，尤其退休者，是存美元或港元定期。最好網上做！否則一入銀行，必被投資顧問游說你買「必蝕基金」，千祈咪制！
　　
三、若真的手癢癢想買股票，咁就只買以下四隻：A、長實集團（1113），李氏父子近兩年不停回購，已是明燈，唔會死錯人。B、中電（0002），疫情過後，澳洲及印度業務已有改善，香港呢邊永遠穩如泰山。嘉道理家族作風殷實，信譽昭著，五厘利息，可作「投資膽」。C、國泰航空（0293），通關後立即轉勢，業務起飛，轉虧為盈。D、港交所（0388），政府指定「獨家做莊」，得天獨厚。
　　
以上四隻現價入，勿理短期波動，長揸應該跑贏大市。