【曾智華專欄】齊齊改穿波鞋

大班舊同事聚會，人人已是七十或以上，自然話題也與年齡有關。
　　
其中之一，屬重中之重，為防跌！點解？因原來身邊不停有人（老友或親人）跌倒。個別更為傳媒名人（並非如蔡瀾般個個皆知）。原來跌倒不一定要在街上（例如香樹輝在灣仔史超域道），更多是在家中。而家中呢，不一定在洗手間（因經常有人在此跌倒，反而大家小心），而往往是在廳中行過枱椅，一勾就仆直！
　　
長者，尤其骨質疏鬆一族（有得驗及食補充劑改善），一跌，多斷手或腳。最弊跌碎股頸骨，咁就有排「坐」（臥床不能落地）。
　　
呢一「坐」，必搞到生活樂趣冇晒，令人生變灰，更可能陷於抑鬱，肯定命都短幾年。
　　
既然咁嚴重，於是大家七嘴八舌研究點防跌。最大路當然是紀律性做各種平衡運動，尤其要日日拉筋，將身體所有部分柔軟化。
　　
大熱天時不宜外出運動？冇問題！小弟方法，搵個大型商場急步行來行去（執筆前，剛在又一城上上落落幾十次，行咗一小時）。又或搵個公共屋邨停車場，設計通風的一種，不停來回行及用欄杆壓腿。
　　
我家附近正有愛民邨及何文田邨，到入秋就可再到巴富街球場及高山公園嘞。
　　
另一樣搞笑為身體肌肉流失，男女有別。男的屁股好多早早漸漸消失，而女的則相反。故若向後坐跌低，男長者較危險。但是男性點變返個籮柚出嚟呢？
　　
當晚男男女女一致做緊的，正是放棄穿皮鞋及高跟鞋，改而全天候穿波鞋。
　　
定要選擇舒適厚底具彈力的，更重要能啜地防濕滑。
　　
高齡人口大增，因應市場需要，N咁多悅目設計波鞋推出，襯裙襯西裝都冇問題。