【曾智華專欄】最受歡迎練馬師

睇見今日標題，馬迷老友必定「吓」的一聲。
　　
點解？因香港根本就冇「最受歡迎練馬師」選舉，而所有馬會舉辦的選舉，已於昨日截止。
　　
馬迷老友啱晒！不過咁，我指的「最受歡迎練馬師」，並非由公眾選出的，而是小弟多年觀察，以及由圈中老友提供的。
　　
邊個有咁「江湖地位」？
　　
眾所周知，馬圈乃一個山頭林立、名利爭奪的圈子，尤其練馬師，除個個有英雄感，愛威愛贏之外，好馬也是你爭我奪、你撬我挖。無他，有靚馬才有贏馬本錢，有贏馬本錢才會財源滾滾又威威。故此，基本上練馬師之間，不會存在太多老友感情，多只是嘻嘻哈哈。
　　
不過，若果你性格較易相處、較樂觀，又或較識做，咁起碼冇咁乞人憎。
　　
未講圈內最受歡迎，先講最乞人憎的，華洋各有一個，乃公認的。基本上，差不多所有練馬師同佢兩個都不但冇交情，亦冇乜偈傾。
　　
我當然唔會在此公開，大家自己估好了。
　　
但最受歡迎的，就可揭曉，正是方嘉柏。
　　
方仔自幼在香港馬圈打滾，人脈固然四通八達，加上處事有開埋（記得鄭俊偉掟馬簿事件嗎？），故廣結人緣，除咗一個騎師！兩人誤會之深，難以想像。
　　
想知邊個？易，打開騎練合作，方仔個個騎師都有交易，只有一個冇，而主角騎師亦是個個馬房有交易，唯一與方廄水溝油！
　　
高伯新拜拜，上周搞送別宴，也可睇到點點圈內關係，正是一個華人練馬師都冇份！而最乞人憎的那位外籍練馬師，當然也冇份！
　　
明天戲碼普通。蔡神仙出得「驕陽明駒」，當然不會只熱食一隻！預埋「魅力一心」、「速遞奇兵」及夠鐘見真章的「安泰」啦，後者應有分頭！