曾智華-專欄
2023-07-05 12:45:46
【曾智華專欄】想知周杰倫點睇?
香港人十之八九有「投資」(其實大部分是似盲俠的賭博),亦十之八九覺得自己有機會贏,所以才樂此不疲地「參與遊戲」。
不過,最終結果,你知我知,亦必有經驗,就是十之八九蝕到眼癱癱。
原因?是「投資」(金融產品)與賭博(尤其賽馬),是一個「資訊不對等」的遊戲。
意即幕後人知道的、掌握的、操控的,與儍吓儍吓的參與者差異極大,故此,參與者多似水魚,被人引入籠之後,就劏得!
二十多年前小弟訪問「賭王」何鴻燊,佢笑笑口話:「我唔賭,但必贏!因賭場只有一個長勝者,正是莊家,即係我,哈哈哈!」
某個程度上,新股上市也一樣。今年第二季上市的新股有十三隻,八隻一上即蝕,問你死未?
最尾的一隻名綠竹生物,首日跌三成三!能夠幸免於難的五隻,也只得由半巴仙至五點五巴仙,整體新股就是一個「慘」字。
不過,這遊戲當然會繼續,因為仍有機構(多屬小型)的保薦人,也仍有「國際配售」(九成!究竟乜嘢基金會買?),只得十個巴仙由散戶接貨。
本周有四隻招股,我肥碌最好奇,為上次「出閘墮馬」的巨星傳奇(6683),反應如何?因巨星傳奇賣點是「周杰倫概念」,但奇在周杰倫及母親葉惠美從未現身作生招牌,也從未幫手四圍做推介。
如此情況下,5月第一次上市,竟獅子開大口,招股價開五元五角。結果反應超差,即時冚旗。
如今又再嚟,減至四元二角半。點解無財經記者走去搵周杰倫,問佢在此公司的真正(究竟有冇?)角色呢?