【曾智華專欄】學歷履歷財力病歷

不少人話：「世界好唔公平！」
　　
我絕對認同，也絕對不認同。認同的是先天部分，不認同的是後天部分。
　　
先天，冇得救。例如你一出世，就已定咗幾高幾矮、乜嘢膚色、父母是誰、樣貌如何，連頭髮濃密及五官端正否，全部定型。呢種注定的一切，冇乜公唔公平，天生。
　　
但後天呢？百分之九十種瓜得瓜，種豆得豆。尤其入到職場，大家根本無「先天」，只講表現時，若你成堆爛泥款，冇禮貌、唔專業、

不增值、吞卜蛇王、人緣差勁，對內對外關係一塌糊塗，咁請問你仲有乜條件、有乜本錢，希望得到「公平」？唯一的「公平」，就算你不被炒魷，也是永遠在公司最低層做浮游生物，人人都冇興趣同你交往。
　　
放大睇，其實整個人生也如是。
　　
老友羅國森擅長人生規劃及財務規劃，佢有一個理念，為人生分上下半場。從佢觀察，上半場搏老命者，用種瓜得瓜理論，一定係學歷高、履歷高，又或財力高。因無論讀書、工作的拼勁，以及投入的時間及犧牲，永遠犀利過平排競爭者，自然「兩歷一力」特別驕人。
　　
不過，咁搏法，一定在智力及體力方面大大超支，心理負荷也永遠比適可而止一族重得多。若用機器和車輛比擬，架架車都應該可行10萬公里的，但你一落地即狂谷，又唔畀佢充分休息，又唔錫住用，更成日話冇時間，唔攞去Check車保養，咁⋯⋯到下半場咪收成囉。
　　
羅國森見到的，正是不少上半場的「法拉利」，下半場變老爺「爛車」，件件零件（器官）都出問題，見醫生多過見老友。
　　
你話係咪好公平？老友，你又想谷到架車爆偈，但又想佢十幾年後仍似新車？有冇咁符碌？