【曾智華專欄】殺得過癮，打得開心

喂喂，我究竟是否變態？殺人會過癮？打人會開心？冇變態，珍珠冇咁真！
　　
早前小弟在此表示，凡入戲院睇《殺神》系列及《狂野時速》系列，皆會中途離場。不是對影片有甚麼不滿，而是睇殺人殺到滯及飛車飛到悶，夠皮，再睇落去變反高潮，於是立即拜拜，反正磨落去也不會再有甚麼驚喜。
　　
不過，若是睇李小龍或者甄子丹扮演陳真及葉問，則套套睇到完，直至最後一分鐘。
　　
同是打打殺殺，《殺神》及《狂野時速》超級大製作，點解殺到中途就失去吸引？你話呢？
　　
上周四一套新片上畫，我又依例第一時間仆去睇長者早場。2017年及2022年皆如是，今次第三次，正是捧韓國正義大隻佬馬東石場，睇佢嘅《犯罪都市》系列，今次為《鐵拳掃毒》。聽講若受落，系列會拍八集。今年肥馬52歲，若拍晒，60開外矣。
　　
《犯罪都市》冇飛機大炮科技或大陣仗戰鬥及飛車場面，其實來來去去賣一個正氣正義肥佬刑警，點解咁收得？
　　
簡單分析，電影之內人物不似現實，全部忠奸分明，忠人得勝，奸人被殺或被打到開花，大快人心也，這正是夢工場能做得到的。
　　
睇馬東石打壞人，過癮到極。因佢雖肥大超重，但非常靈活，拳風虎虎，睇得出真材實料，力撥千斤。加上劇本及對白過癮，而肥馬則永遠木口木面，有強烈戲劇效果。
　　
另一元素為玩反差。一如黃飛鴻片及葉問片，師傅威晒，相對的徒弟，個個甩皮甩骨，故每次見師傅罵人，觀眾皆大樂。
　　
戲內馬東石班馬仔，個個儍吓儍吓，非常有喜劇效果。再拼埋中、日、韓黑幫全部衰晒，大快人心。
　　
睇完，開開心心離場！