【曾智華專欄】燈神投注大法

馬迷投注，各家師各法。有的強調理性邏輯，有的迷信風水命運，有的根本亂撞。

通常最多人研究練馬師、騎師、血統、檔位、特長、分數、歲數、班次、賠率、馬主⋯⋯以至騎師名字、綵衣，再到騎練或馬主有冇家人出現（「零零亨」的人妻觀察報道）⋯⋯近年有一種投注法，當事人乜都唔研究，只準備大批現金，𥄫實「燈神指示」。

即係點？即每場馬匹入閘前，可能突然有天文數字注款打落某隻冷馬，令賠率大幅急跌。這種情況出現時，馬會立即會以「啡燈」顯示。這個顯示大有參考價值，因巨額投注絕對是「空穴來風」！

老友「馬精R」正是燈神投資專家，次次賽馬完全唔刨。佢話：「多餘，嘥時間，不如等大戶替我刨好過。總之凡啡燈出現，就搵嗰隻做膽，單式二重彩全餐！」

小弟從不以此法下注，因覺太機械化，失卻跑馬分析再決定下注之樂趣。

不過，事實R哥又不時贏。執到錢後要搵人「晒」，必定來電。呢呢，上周日又中正喇：「碌Sir，今日執到近七千元，快啲出嚟鋸扒！」

當日燈神指示五隻——「喜悅精靈」、「巴基之友」、「好友心得」、「歡欣福星」及「天外飛天」。

結果頭兩隻W出，「馬精R」每注一百元，中兩場，總共大勝六千九百三十元，難怪興奮到紮紮跳，死都要拉我晚餐晒威水史也。

今晚又跑馬。季尾，要睇緊掙扎求存的馬房，因任何贏馬機會皆必不會放過。

果如是，第四場就兩隻門志非常鮮明馬，根本唔使諗「會唔會去」！第一匹為葉廄「友心友型」，今季未W，但愈來愈近。上次潘頓騎，擺明試，今次再騎，見真章啦。

另一匹何廄「謙謙君子」，今季同程兩P，已到取勝邊緣。兩匹WPQ投注可也。