【曾智華專欄】廣播界鐵律：狠

無線音樂節目《勁歌金曲》播映四十三年，終於叮叮，到站喇，落車喇！不少人提起此節目，皆冠以「香港電視史上最長壽音樂節目」，這個

「名銜」有冇意義呢？冇！絕對冇！其實《勁歌金曲》根本應該二十年前執包袱，因最光輝時期已過，再磨下去只會滑落。若當時TVB能決斷地將佢「光榮引退」，再創作一個新形象的音樂節目，效果理應較好。

結果當年無線決策人沒有手起刀落，拖呀拖，拖到由黃金時間變到三線時間，搞到變又長又短，收視仍疲不能興。任何廣播節目及主持人，電視好，電台好，無論高峰時幾巴閉，幾高收視、收聽，過咗氣就是過咗氣，你自己唔識Out，咁就由觀眾、聽眾將你Out，到時更難睇、更殘酷、更冷血。

舉例，巴閉如上世六十、七十、八十年代橫掃香港的《歡樂今宵》，曾陪香港市民度過不少難忘經典時光。結果點？一夠鐘，立即冇得留低。

節目被淘汰，通常有兩個原因，一為節目形式已過時，例如夠鐘的《歡樂今宵》及港台一度王牌年輕人節目《青春交響曲》，後者更「死」在我領導香港電台第二台的年代。

可惜嗎？丁點也不可惜，冇晒市場價值也。另一類節目被Out，最為無奈，乃因為靈魂離開，冇咗靈魂，邊個做都再冇韻味，不如當機立斷，將佢變為回憶更好。例如早年香港電台的《三個小神仙》、《三個寂寞的心》及《LTVCafé》。

其實人多數不願做「劊子手」，斬主持人好，斬長壽節目好，都有點「醜人」味道。何必偏偏選中我（下毒手）呢？但是你坐得上廣播機構管理層位置，就要有這種「狠心」。否則，婆婆媽媽，拖拖拉拉，你未被淘汰前，機構已被無情的市場淘汰！