曾智華-專欄
2023-05-03 16:12:50

【曾智華專欄】有頭威冇尾陣

童年時,長輩經常教訓:「儍仔,你記住呀,做人做事,千祈咪有頭威冇尾陣呀!」
  
當時得幾歲,聽咗雖然入咗腦,但從冇實際體驗。直至長大後,開始進入社會工作,加上喜愛觀賞賽馬,咁就愈來愈有感覺嘞。
  
用賽馬形容最貼切。一場馬十四隻,隻隻有不同潛質及天分,有啲長途,有啲短途。
  
短途馬通常開閘搶放,嘭嘭聲,最好一啖氣由頭帶到尾勝出。但短途馬不可能成為馬王,競賽的壽命也不會太長,兼且論馬實力、論騎師技巧、論練馬師功力,也不會太高深,值得欣賞之處略欠缺。
  
長途馬完全兩回事,多數在高班比併,有頭威的,十之九九無尾陣。意即出閘會狂放,但只得一段力,去到中途已用完,轉入直路,變腳軟無氣,任對手超越,最終大敗而回。
  
小弟多年職場觀察,也如是。
  
通常一加入機構,一開始工作,立即熱情如火,乜都搶著做,乜都第一個發言,更任何事、任何制度未清楚前,已意見多多者,十之七八屬「單料銅煲」,快熱,但更快冷卻。到中段開始怨言多多,然後⋯⋯只能在中下層掙扎。
  
其實做人做事,真的如跑大長途,充滿策略與韌力,不爭一時之氣,最重要臨尾勝出。
  
今日講咁多「道理」,因剛剛睇完一套電影,導演戴文舒方正正是有頭威無尾陣。
  
電影名《追捕殺人犯》(《Catch A Killer》)。開場正到飛起,拍攝美國現代大城市歡樂除夕晚上,在煙花爆滿天時人人狂歡。不過,夾雜在煙花隆隆聲中,響起嘭嘭槍聲,一個槍法神準的殺人狂,冷血射殺二十多人,槍槍攞命。
  
開場十分鐘,勁吸引,經已值回票價。不過,發展下去,實在有點反高潮,冇晒尾陣。