【曾智華專欄】冰凍啤酒電影

電影與樂曲，頗似酒類。有深度及藝術成分高的電影或樂曲，就似一支陳年干邑、威士忌或砵酒，一入口，識貨者必能體會內裏的心血及釀酒師的功力，當然，更重要是用上甚麼質素的大麥及葡萄，做出餘韻無窮、長存腦海的佳釀。
　　
電影與樂曲，同時也可似冰凍啤酒，清爽，過癮，嗗碌嗗碌易入口，令人快慰，然後胃氣一吐而出，舒服晒。但有冇延續享受感覺？冇！有冇值得欣賞之處？冇！有冇藝術或深度？冇！總之是冇冇冇，乜都冇！
　　
香港早年最擅長出品「冰凍啤酒電影」，包括無厘頭笑片、熱鬧賀歲片，以及某些「大導演」最引以為傲的屎尿屁片。不少極之收得，但有冇信息？冇！有冇傳承價值？冇！有冇機會受欣賞問鼎《電影金像獎》？冇！總之過吓癮就算，根本冇人再記起，也可能提都唔想提。
　　
今日長篇大論，因想介紹一套在台灣狂收過億元的「冰凍啤酒電影」《關於我和鬼變成家人的那件事》（水蛇膥咁長，記都記到癲）。
　　
此片真的很過癮，劇本天馬行空，結合台灣傳統習俗中的冥婚、男同性戀及刑警查案，混為一個黑色動作喜劇。
　　
主角皆靚仔靚女（許光漢、林柏宏及王淨），故此，視覺上已清新易接受（冰凍啤酒）。加上幾位的喜劇細胞也不弱，故娛樂性特高。這就解釋到，點解在台灣狂收，因充滿「台灣味」。
　　
不過，票房在香港又如何？應遠遠不及能引起香港人共鳴的港產片。
　　
《關於》一片最勁的是連場飛車設計，絕對荷里活A級水準。一查之下，動作指導名洪昰顥，三十二歲，必大把前途，難怪去年已奪得《金馬獎》最佳動作指導。單睇佢的犀利法，已值入場！