【曾智華專欄】要交代，大壓力

上周本報內頁大標題，寫上《太古廣場3000呎單位月租37.7萬，林鄭辦公室首年開支1350萬》。
　　
可能標題太「震撼」，當朝步入慣常的草根茶記，竟見兩位的士大叔就此作討論，面紅耳熱上晒心。其中首先發言的，有點躁底，十足十《白日青春》裏的黃秋生，造型百分百神似。
　　
肥叔：「唓，有冇搞錯啊，都落咗台啦，又冇乜重要公職，使唔使用千幾萬元一年辦公呀？究竟有乜公辦，要幾個人全職服侍，再另加三千呎地方呀？大佬，係人都知大量劏房戶，每人連三十呎棲身都冇啦。」
　　
矮叔：「肥佬，條氣唔順都冇計喎，例係死嘅，早早定低晒（塘邊鶴：「係呀，畀幾多我哋有聲出咩？」），規定佢可享有一切，除非政府自己都覺得離譜，主動修改啦。」
　　
肥佬：「制度死嘅，人係生嘅，你試吓行出街問吓任何市民，有冇人覺得一位前特首要如此奢華形式繼續辦公吖！」
　　
矮叔：「又係嘅，唉……千幾萬之中，有六百幾萬用咗嚟裝修買家具，我有個做裝修老友睇過個單位，笑笑口話：『今勻有行家發達嘞！』林鄭辦公室報告話佢過去幾個月做咗百次推廣性活動喎，又香港又海外市場及錄影進行，哈，究竟內容係乜呢吓？」
　　
肥叔：「老老實實，如今林鄭真係有啲『困境』㗎，好在冇晒民主派咋，否則，必定畀人日日問責，要求交代份工點樣衡功量值，直到煩死佢為止！講開又講，究竟『前特首』呢份工有冇得辭職嘅呢？既然佢公開訪問時，喊住表明話希望做返個普通人，做返丈夫的太太，以及做返兩個兒子的媽媽，若真有如此心願，就應朝呢個目標進發啦⋯⋯ 」