曾智華-專欄
2023-04-03 12:46:04

【曾智華專欄】一次掂咗,陸續有來

由都會駅業主委員會發起,反對將軍澳填海及興建廢物轉運站設施的遊行,「萬眾矚目」下,安然完成,無風無浪。
  
大家都知道,經過過去三年的事件,各方對群眾活動,怎不高度緊張?重新可以遊行的第一次,設下重重關卡,雖覺綁手綁腳(有人搞笑話綁埋頸),但行出咗呢一步,下次就應好辦事。
  
香港行一國兩制,而法例聲明群眾有集會結社自由。此乃一個非常重要的對外訊號,不能長時間撳住,因絕不健康也難看。
  
但現實歸現實,有好多突發情況,政府不能不考慮,安全至上也。相信大部分香港人,雖然不願意如此,但也明白應先接受,再慢慢逐步放鬆。
  
大家有冇留意,呢個遊行,除咗要掛頸牌,在橙色線內進行外,更唔准戴口罩,以配合「蒙面法」。就咁,「陪遊行」的警員也除去口罩,一視同仁,大家可有察覺此細微安排?
  
遊行完一次,肯定陸續有來。理所當然,一切有關政治性議題,有排都唔會批㗎嘞,等時間解決啦,先集中關注其他議題。
  
正如小弟向新聞系大學生講,做傳媒,做新聞,要放眼社會。香港之內,有無數問題,需要關注,需要監察,需要報道,暫時政治議題是禁忌,為免觸及紅線,唔掂住,忍一忍。
  
但之外?喂喂,仲有教育、運輸、交通、環保、醫療、衛生、體育、旅遊、科技、商業、基建、金融、地產……N咁多議題畀你報道、批評,甚至對政策挑戰噃。
  我
絕對不是個「放棄主義」者,反之,有幾多空間就必定會爭取,去到盡,做到盡,玩到盡。
  
大家應理解(不等於接受),人生不會順風順水,社會也如是,暫時唔就,先轉一轉——山不轉,人可轉!