【曾智華專欄】由站街市到上雲端

跑馬有爆冷，但在中國官場，「跑人」則冇，全部意料之內，百分百由大熱門勝出，安全系數絕對爆表！
　　
西方世界當然嗤之以鼻，但中國思維就是穩定壓倒一切，國情不同，制度不同，得出的效果也不同。你不需要同意我，我也不會同意你，各家師各法也。
　　
基於這個原則，大家唔使估嘞。民建聯主席李慧琼，必定獲選全國人大常委。
　　
事實中國安排佢坐入全國人大會議主席團，已是一個Crystal Clear的訊號，中硬。
　　
講起李慧琼，令我時光倒流十幾年。小弟住在土瓜灣附近，當年乃曾鈺成選區，也是涂謹申選區。基於工作關係，同兩位都熟，亦稱得上是朋友。上世紀八十、九十年代，民建聯與民主黨的中堅人物好多溝通，絕無劍拔弩張的氣氛。
　　
我就試過拉攏李柱銘（民主黨主席）、李鵬飛（自由黨主席）及曾鈺成（民建聯主席）於《十大中文金曲頒獎音樂會》一同頒獎，當年佢哋更不時一齊搓麻將㗎！
　　
講返李慧琼，早被曾鈺成睇中，覺得斯文淡定有人緣，於是早年凡要在街上嗌咪拉票，一定安排佢在身邊。
　　
我第一次見Starry，就在土瓜灣天橋底，有少少低調沉默，絕無半點政客味道。直覺上，佢絕對比其他民建聯分子優勝，尤其在氣質上，並沒有太大「左派味道」，當時已覺佢在「親中圈子」會很快出頭，因佢哋太欠這類有專業背景又易被
接受的人物。
　　
2019年之前，香港政圈火藥味沖天，不少女議員皆突然「面目猙獰」，唯獨Starry在歷次衝突中，仍保持一貫淡定而沒失控。
　　
真的，若建制派中多幾個李小姐質素議員，早早就唔使阿爺心急如焚了。