【曾智華專欄】曾潔兒勝過梅艷芳

終於睇咗《毒舌大狀》，有很多角度想講。其他人集中講黃子華，不如我講一眾女角，在此片中，乃一大亮點。
　　
先講王丹妮，片中扮演被陷害誤殺的可憐母親曾潔兒。演技明顯比《梅艷芳》時有大躍進。其實，去年奪得《電影金像獎》最佳新演員，潛質早露。今次拿揑戲中人的起伏情緒，由外形到眼神，完全入戲，沒有似演《梅艷芳》時，間中有做戲痕迹，應該可以提名最佳女主角了。
　　
另一耀眼者，為去年奪得最佳女配角的廖子妤。前年初見佢在《智齒》中扮演殘障女毒販，已肯定會爆出，因演技實在無懈可擊，擺明天才。睇完《毒舌大狀》，更加服，佢真係可以扮乜似乜。殘障女毒販上晒身，得！今次一百八十度華麗轉身，演名門望族高貴闊太，畀我見過的真實闊太擁有更大氣場。這方面，此片形象指導也應記大功，因每套名牌穿在廖子妤身上，立即發出高檔次艷光。
　　
另外，飾演正義年輕大狀的楊偲泳，也極有觀眾緣，真的人見人愛。但有點奇，若用賽馬術語，佢在此片演出，可用前段洶湧、後段平平來形容。最初的一場法庭戲，光芒四射。不過，其後的幾場，則略略出現後勁不繼現象，未知為何。
　　
《毒舌大狀》，當然以法庭戲為主，所以，一定有法官，而這個法官的演出，對整部戲也非常重要。遺憾地，小弟認為「卡士」誰演法官者，略為失手。
　　
戲內的高院原訟庭法官，由資深體育節目主持韓毓霞擔演。對，佢曾經在報道奧運時表現出色，同時亦有演戲經驗，不過，坐在高等法院扮法官審案？唔好講笑啦，點壓場呀？演來毫無說服力，有點不三不四。