【曾智華專欄】通關絕不可「公平」

每日六萬人放入十四億人口國家，根本是微塵幾陣。但每日六萬人湧入七百萬人口城市，尤其集中在廣東道、銅鑼灣及上水，咁就……一定非常震撼！再者，若全部奔向同一目標——掃藥及打針，咁……你話香港點頂？

終於上述的後者根本冇出現。是否內地同胞冇興趣殺到港澳台？當然唔係。而係一如熟知北京政策的政論家盧永雄指出，此乃中央有序地控制節奏，慢慢一步步來。
事實，幾年前當港珠澳大橋通車前，也有人驚到腳震震。因若以對等政策，港澳車可以入內地，內地車也應有「同等權利」，雙向來香港，咁先算「平等政策」，係咪？

當時連最最最講公平理念者，都唔敢宣揚呢個「大原則」，因明知死硬。你香港得幾十萬部車，就算一成揸入到內地，都係幾萬，真是微塵幾陣。

倒轉，內地幾千萬車，湧百分一來，都有幾十萬輛，未過橋已壓冧成個香港啦，吓嘛？結果有冇發生？冇！因為「公平政策」並沒有出現，如此就可保住香港冇冧檔！

其實兩地政府在月前，早應做多點期望管理，詳細列出通關的原則、政策及步驟，咁就唔使令香港搞到人心惶惶，個個走去搶退燒藥，生霸死霸啦。

如今宣布仍未遲。本報上周六頭條新聞，相當嚇人㗎——報復式旅行、逼爆公安局中簽註；內地逾百萬大軍，新春搶遊港澳台。

喂喂，唔該官方講明，呢百萬大軍究竟係：一、一百萬定幾百萬？二、分別申請目的地去邊？幾多成想來香港？三、將會用乜方式安排到港？每日每周每月放幾多客人落嚟？
　　
究竟我哋是否要紮定馬，部署迎接大群「財神」呢？