【曾智華專欄】世界盃，政府包

世界盃，眾所周知有兩大神奇功效：一、製造大量商業機會，打造一條財富效應鏈。二、令全人類歡樂、投入、興奮、和諧。
　　
世界盃開打，仲有冇人理啲雞毛蒜皮政治爭拗，又或你係邊個政治陣營？冇！起碼暫時！大家坐埋就可「隊」啤酒吹水各自分析，各捧自己球隊。
　　
呢個時候，連埋怨政府的動力也驟然低降，因注意力已分散也。所以，任何政府皆不可忽視世界盃帶來的「和諧力量」，醒的理應谷盡用盡。　
　　
香港世界盃的播映權，從來是各大傳媒兵家必爭之地。可惜，隨着電視台縮皮，慢慢變成冇乜人爭，於是競投時變鬥低價。
　　
電視台乃盤生意，當然一切講計數。若天價投回來的廣播權，廣告沒辦法填氹的話，當然放棄。本來若幾個台有計傾，也可好似地產商聯合投地咁，攜手出價，唔爭。
　　
不過，人有私心，公司也有，我吞得落，變獨霸，就算蝕本，若能在聲勢上贏盡，咁就一於當花錢打造集團強勢形象，視為廣告費，也是值的。
　　
尤其Now不但是Now，背後仍有大盤各類生意頂住。以「楷仔」的精明，當然唔會死錯人。
　　
世界盃獨家播放，其實非常之不理想。因有大部分市民無法欣賞（除幾場免費的），於是，間接變成「特權娛樂」，製造社會矛盾。
　　
小弟睇，若想為香港帶來整體利益（政治和諧，市民歡樂、政府形象……），政府應該立即部署與幾個台達成協議，由政府出面買下下屆廣播權，再拆開畀每個台播。而各自得到的廣告收益，再度度如何分成，回歸部分畀庫房。
　　
當世界盃成為全港集體娛樂時，必出現兩個現象：一、香港社會有一個月和諧、快樂；二、政府爭取到大量民心及支持，施政必更加暢順。
　　
有人會問，錢點撥出？撥幾多？第一條乃技術性問題，事在人為。第二條，幾多就幾多啦，今年金管局都蝕成三千億元啦。好多花費，收益係無形嘅。更何況政府一話做，可能大量財團踴躍捐輸，幾大都要佔一份呢。