【曾智華專欄】黎昭昇好鬼尷尬

球場、商場、法庭⋯⋯全皆英雄地，只問贏輸，不問其他。總之，就是Winner Takes It All。只見勝者笑，哪管敗者哭。馬場，更百分百如此！講到天花龍鳳，有幾大來頭，曾經幾威，全部冇用，一切只講成績。
　　
睇咗兩個月，相信仍然冇乜馬迷想落井下石，但起碼會問：「喂，點解佢至今仍然冇料到㗎？」
　　
講的當然是三十出頭、在紐西蘭被譽為巨星的天才練馬師黎昭昇。年紀輕輕已掃下當地所有大賽冠軍，兼且一連四屆登頂。
　　
正因如此，才被香港馬會看中，力邀到港開倉。相信管理層早早認定佢應是另一個「蔡神仙」——能人所不能，贏馬可以易到似斬瓜切菜。
　　
所以，佢一開倉，即收天價最貴練馬費，七萬幾元，比同是新開倉的伍鵬志高成萬蚊一個月。初初看台不少論調：「咁巴閉，收貴啲，值㗎。做馬主想贏啫，多一兩萬元係乜嘢錢？」
　　
好嘞，賽事一日一日過去，轉眼跑咗兩個月。兩個新倉同時有四十幾匹舊馬。伍鵬志經已贏咗九場，入Q十三場，第三也是十三場。論四甲，足足四十七場，獲得獎金一千三百九十九萬七千七百七十五元，也贏過盃賽。
　　
黎昭昇又如何？都幾該煨！只有一場普通頭馬，三場入Q。論四甲，八場，獎金非常奀豬，只得一百五十萬二千五百五十元。
　　
用賽車術語，老黎遇上伍仔！一鍊之下，連尾燈都睇唔到，完完全全食塵。
　　
究竟這現象會繼續幾耐？相信冇一個馬迷想黎昭昇日日被柴台，柴到零信心，然後黯然引退的。不過，馬場乃英雄地，冇人會同情得佢太耐，唯一立即交出成績，有料到，形象才能翻身。
　　
講返今日，高班大賽「樂聲盃」，應屬單打獨鬥場合。蘇兆輝的「健康愉快」火併潘頓的「北極光」。周三小弟指出，潘頓騎告仔熱馬，一定唔敢古靈精怪開「蟲」，又中！賀賢的馬也如是。「北極光」上場希威森入P，今場潘頓親征，一於一W三P扑落去。