【曾智華專欄】執法者Instinct

大家有冇發覺，今年海關真的是非常英明神武，大案破完一單又一單，似是上天顯靈，為去年殉職的高級女督察林婉儀，來一個高層次的感謝，將所有走私犯殺個片甲不留。
　　
最新一宗，又是極之轟動，破獲椰子水藏冰毒，貨值十一億元，又創歷史新紀錄。呢批貨若運抵澳洲，「身價」可一炒而上，變成八十億元，睇嚟呢鋪令不少毒販損失極度慘重。不過，毋須同情，因佢哋個個抵死！
　　
海關除掃對社會遺禍深遠的毒品外，好多人，包括我，無法明白為乜要經常黑夜博，追超級馬力快艇。然後拉到的好鬼搞笑，可能是化妝品、凍肉、龍蝦、象拔蚌之類「無聊嘢」。
　　
有晚飯聚，剛剛遇上紀律部隊大Sir，立即好奇一問（當時林婉儀過身不久）：「大Sir，走私啲電器呀、海鮮呀、凍肉呀，甚至香煙，點解要搵命博去追呢？黑漆海上同班亡命之徒鬥快，唔值得啫，吓嘛？有乜原因？」
　　
大Sir低頭半沉思：「其實我哋都唔鼓勵同事在危險情況下去博㗎，冇咁嘅必要冒如此大危險。不過，做得紀律部隊的，正常的，皆有個執法者Instinct（本能），見賊就追，見罪案發生就拉罪犯，好多時唔會先周詳作出自身安全的考慮。事實，我也會如此！」
　　
大家知唔知本能係乜呢？正是一種先天行為，指一個生物體趨向於某一特定行為的內在傾向。凡遇上一種可清晰界定的刺激，生物體會回應以一系列固定的動作，時間長度由很短到中等。通常本能發生時，並沒機會慢慢思考，總之，應做/要做就去做。
　　
其實每個專業都有其本能。做新聞傳媒的，一定會希望制衡權力，將社會公義發揮到盡。
　　
做議員的，一定是要監察政府正確行使公權及控制財政支出。
　　
不過，你知我知，間中政治大氣候之下，不同專業也要調校不同的「本能」，並不純以個人意志為依歸！