孤寒老闆好好玩

「傳媒老是佛慈善夜」，各人輪流上台大爆特爆，不少內容笑刺肚皮，既然無傷大雅，部分可以公開。
　　
話說一直以來，個別電視台老闆級人馬，非常精打細算，即係乜？即係孤寒及小家呀！佢哋作風，與電視台播出節目畀人的感覺，非常兩樣。電視大騷，全部金碧輝煌，搭個景都好似有使唔完的錢。實質呢……當然唔係！
　　
大家耳熟能詳的，是昔日A記老闆限用廁紙及關電梯慳電笑話。
　　
原來B記賺最多錢時期，也不遑多讓㗎！其大管家著名數口犀利，慣性日日周圍巡。有日黃昏，站在停車場望上三樓，咦……唔……即Call總經理：「為乜同事咁嘥電，未黑齊就開燈？」
　　
老總唔敢駁，速速查。哎吔吔，原來電視台燈有自動掣（似街燈），一到光度不足就會自動開，就咁簡單。不過，既然大管家唔Likey，老總亦無謂解釋，速命技工再調黑點才自動著燈可也，當然，員工個個MM聲啦。
　　
大管家試過巡錄影廠，嘩，大劑！又畀佢搵到有人浪費嘢。原來木工通常拆景後，鐵釘隨處掉，等清潔工清理。大管家行過，有如發現「新大陸」！逐顆可再用的釘執呀執，放入雞皮紙袋，跑到總經理室，掟在枱面：「X總，你睇吓佢哋幾大嘥？呢包釘，絕對可以再用！快下令！」
　　
老總唔識笑。唉，大管家幾十億元身家，搞埋啲咁細眉細眼嘢，真係……況且請人執釘再選出完好的，你估唔使人工乎？
　　
又一次，A記老闆見記者時，窒大管家兩句：「我哋蝕錢，因同事不似B記大管家咁，連五仙使費都𥄫到緊，所以……」
　　
記者如實報道。
　　
翌日。B記開高層會議，大管家攤開報章，指住段新聞。起初一眾高層以為佢會發火，點知唔係，反而好高興話：「哈哈哈，A記老闆都儍嘅！話B記賺錢因我連五仙使費都計較？錯錯錯！你哋個個知，其實我係連一個仙使費都計較，哈哈哈，佢仲話學人做生意？蝕死佢呀！」